ମୁମ୍ବାଇ(ବଡ଼ ଖବର ବ୍ୟୁରୋ): ମହାରାଷ୍ଟ୍ରରେ ଦୁଇ ଦିନ ଧରି ଲାଗିରହିଛି ବର୍ଷା । ସେହି କାରଣରୁ ବର୍ଷା ବିପର୍ଯ୍ୟୟ ସୃଷ୍ଟି କରିଛି। ତେବେ ରାୟଗଡ଼ ଏବଂ ରତ୍ନଗିରିରେ ଭୂସ୍ଖଳନ ଯୋଗୁ ୩୮ ଜଣଙ୍କ ମୃତ୍ୟୁ ଘଟିଛି ଏବଂ ୮୫ରୁ ଅଧିକ ନିଖୋଜ ଅଛନ୍ତି । ତଲାଇରେ ୩୨ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ ସଖରସୁତରୱାଡ଼ି ଗ୍ରାମରୁ ଆଉ ୬ ଜଣଙ୍କ ମୃତଦେହ ଉଦ୍ଧାର ହୋଇଛି। ପଶ୍ଚିମ ମହାରାଷ୍ଟ୍ରର ସତରା ଜିଲ୍ଲାରେ ପଟନ ତହସିଲ ଅଧୀନସ୍ଥ ୨ଟି ସ୍ଥାନରେ ୨୦ରୁ ଅଧିକ ଲୋକ ମାଟିତଳେ ଫସି ଯାଇଛନ୍ତି।
ଅମ୍ବେଗଡ଼ ଏବଂ ମିରଗାଓଁରେ ଭୂସ୍ଖଳନ ଯୋଗୁଁ ୮ଟି ଘର ମାଟିରେ ମିଶିଯାଇଛି ଏବଂ ପ୍ରାୟ ୨୦ ଜଣ ଲୋକ ମାଟି ତଳେ ପୋତି ହୋଇଯାଇଥିବା ଜଣାପଡ଼ିଛି। ଅମ୍ବେଗଡ଼ରେ ୪ଟି ଘରେ ମାଟିରେ ମିଶିଯାଇଛି ଏବଂ ଏଠାରେ ପ୍ରାୟ ୧୪ ଜଣ ମାଟିତଳେ ଫସିଯାଇଛନ୍ତି। ଅନ୍ୟପକ୍ଷେ ମିରଗାଓଁରେ ୩ଟି ଘର ଭୁଶୁଡ଼ି ପଡ଼ିଥିବା ବେଳେ ୮ରୁ ୧୦ ଜଣ ପୋତି ହୋଇଯାଇଛନ୍ତି ବୋଲି ସତରା ଗ୍ରାମୀଣ ଏସ୍ପି ଅଜୟ କୁମାର ବଂସଲ୍ କହିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ଉକ୍ତ ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି। ମହାରାଷ୍ଟ୍ର ସରକାର ମୃତକଙ୍କ ପରିବାର ସଦସ୍ୟଙ୍କୁ ୫ ଲକ୍ଷ ଘୋଷଣା କରିଥିବା ବେଳେ ପ୍ରଧାନମନ୍ତ୍ରୀ ମୋଦୀ ମୃତକଙ୍କ ପରିବାର ସଦସ୍ୟଙ୍କୁ ୨ ଲକ୍ଷ ଟଙ୍କାର କ୍ଷତିପୂରଣ ଘୋଷଣା କରିଛନ୍ତି। ବନ୍ୟା ସ୍ଥିତି ଓ ଉଦ୍ଧାର କାର୍ଯ୍ୟନେଇ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର ଆଜି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସହ ଆଲୋଚନା କରିଛନ୍ତି।
