ଉତ୍ତରପ୍ରଦେଶ/ମୁରାଦନଗର(ବଡ଼ ଖବର): ଆଜି ଅପରାହ୍ନରେ ଉତ୍ତରପ୍ରଦେଶର ମୁରାଦନଗରର ଏକ ଶବଦାହ ସ୍ଥଳରେ ଛାତ ଭୁଶୁଡ଼ି ୧୮ ଜଣଙ୍କର ମୃତ୍ୟୁ ଘଟିଛି । ଏହି ମୃତ୍ୟୁ ସଂଖ୍ୟା ଆହୁରି ବଢିପାରେ ବୋଲି ଆଶଙ୍କା ରହିଛି । ଶବଦାହ ବେଳେ ବର୍ଷା ହେବାରୁ ୨୫ ରୁ ଅଧିକ ଲୋକ ଆଶ୍ରୟସ୍ଥଳୀରେ ଅଟକିଥିବା ବେଳେ ଛାତଟି ଭୁଶୁଡି ପଡିଥିବା ଜଣାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ଶବଦାହକୁ ଆସିଥିବା ମୃତକଙ୍କ ସମ୍ପର୍କୀୟ ଥିଲେ। ଘଣ୍ଟାଏ ପରେ ଉଦ୍ଧାର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରିରଖିଛନ୍ତି ବୋଲି ଗାଜିଆବାଦ ପୋଲିସ ଅଧୀକ୍ଷକ ଇରାଜ ରାଜ କହିଛନ୍ତି। ଆହତ ମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଜାତୀୟ ବିପର୍ୟ୍ୟୟ ମୁକାବିଲା ଫୋର୍ସ (ଏନଡିଆରଏଫ)ର ଏକ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରିରଖିଛି । ଏହି ଘଟଣାକୁ ନେଇ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୁଃଖ ପ୍ରକାଶ କରିଛନ୍ତି। ପ୍ରତ୍ୟେକ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଆର୍ଥିକ ସହାୟତା ଦେବାକୁ ଯୋଗୀ ସରକାର ଘୋଷଣା କରିଛନ୍ତି । ଏ ସଂପର୍କରେ ଏକ ରିପୋର୍ଟ ଦାଖଲ କରିବାକୁ ମୁଖ୍ୟମନ୍ତ୍ରୀ ମେରୁଟ ଏବଂ ଏଡିଜି ମେରୁଟ ଜୋନର ବିଭାଗୀୟ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି।
