ଦୂର ହେଲା ପାନୀୟଜଳ ସଙ୍କଟ

ଭୁବନ(ବଡ଼ ଖବର ବ୍ୟୁରୋ): ଢେଙ୍କାନାଳ ଜିଲ୍ଲା ଭୁବନ ବ୍ଲକ ଛାଟିଆସାହିରେ ଦେଖାଦେଇଥିଲା ପାନୀୟଜଳ ସଙ୍କଟ । ଛାଟିଆସାହିରେ ସୁବିଧା ଯୋଜନାରେ ସୋଲାର ପାନୀୟଜଳ ପ୍ରକଳ୍ପ ନିର୍ମାଣ କରାଯାଇଥିଲା । କିନ୍ତୁ ଦୁଇ ବର୍ଷ ହେବ ଅଚଳାବସ୍ଥାରେ ପଡିରହିଛି । ଗ୍ରାମବାସୀଙ୍କ ପକ୍ଷରୁ ପ୍ରଶାସନ ଓ ରାଜନେତାମାନଙ୍କୁ ଅଭିଯୋଗ କଲେ ମଧ୍ୟ ସୁଫଳ ମିଳୁ ନଥିଲା । ଗ୍ରାମବାସୀ ନିକଟସ୍ଥ କୁରେଇଜଳା ନାଳରୁ ଚୁଆ ମାଧ୍ୟମରେ ପାଣି ବ୍ୟବହାର କରି ଦିନ କାଟୁଥିଲେ । ଛାଟିଆସାହି ଗ୍ରାମବାସୀଙ୍କ ପାନୀୟଜଳ ସଙ୍କଟ ବଡ଼ ଖବରରେ ପ୍ରସାରିତ ହେବା ପରେ ପ୍ରଶାସନ ଚେଇଁ ଉଠିଥିଲା । ବଡ଼ ଖବର କ୍ୟାମେରା ସମ୍ମୁଖରେ ୧୫ ଦିନ ମଧ୍ୟରେ ଛାଟିଆସାହି ବାସିନ୍ଦାଙ୍କୁ ପାନୀୟ ଜଳ ଯୋଗାଇ ଦେବାର ପ୍ରତିଶୃତି ଦେଇ ପ୍ରତିଶୃତି ରକ୍ଷା କରିଛନ୍ତି ଭୁବନ ବ୍ଳକ ଅଧକ୍ଷ ଧର୍ମାନନ୍ଦ ବରାଳ । ବଡ଼ ଖବର ଟିଭି ଚ୍ୟାନେଲକୁ ଧନ୍ୟବାଦ ଦେବା ସହ ବ୍ଲକ ଅଧକ୍ଷ ଧର୍ମାନନ୍ଦ ବରାଳଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି ଛାଟିଆସାହି ବାସିନ୍ଦା ।