ବାଲେଶ୍ୱର(ବଡ଼ ଖବର ବ୍ୟୁରୋ): ମୋବାଇଲ ଚୋରିରେ ମାତିଛନ୍ତିକି ବାଲେଶ୍ୱର ପୋଲିସ..? ଏଭଳି ସଂଗୀନ ଅଭିଯୋଗ ଆଣିଛନ୍ତି ବାଲେଶ୍ୱର ବଡ଼ ମେଡିକାଲକୁ ଆସିଥିବା ରୋଗୀଙ୍କ ସମ୍ପର୍କୀୟ । ସୂଚନାନୁସାରେ ଗତକାଲି ରାତିରେ ମହିଳା ଓ ପ୍ରସୂତି ବିଭାଗରେ ରୋଗୀମାନଙ୍କ ସମ୍ପର୍କୀୟ ମୋବାଇଲ ଚାର୍ଜରେ ବସାଇଥିଲେ । ହେଲେ କିଛି ସମୟପରେ ମୋବାଇଲ ଆଉ ନଥିଲା । ବହୁତ ଖୋଜାଖୋଜି ପରେ ଜାଣିବାକୁ ପାଇଥିଲେ ପୋଲିସ ସାଧା ପୋଷାକରେ ଆସି ୧୦ଟି ମୋବାଇଲ ନେଇଯାଇଛି । ମୋବାଇଲ ଗୁଡିକ ପୋଲିସ ପାଖରେ ଅଛି ଜାଣି ସକାଳେ ରୋଗୀମାନଙ୍କ ସମ୍ପର୍କୀୟ ଫାଣ୍ଡି ସାମ୍ନାରେ ହୋହଲ୍ଲା କରିଥିଲେ । ପରେ ପୋଲିସ ୧୦ଟି ମୋବାଇଲରୁ ୪ଟି ମୋବାଇଲ ଫେରାଇଛି । ବାକି ୬ଟି ମୋବାଇଲ ବିଷୟରେ କିଛି ଜାଣି ନଥିବା କହିଛି । ତେବେ ଏନେଇ ଗଣମାଧ୍ୟମକୁ ସୂଚନା ଦେଇ ଫାଣ୍ଡି ଅଧିକାରୀ ବିଜୟ ନାୟକ କହିଛନ୍ତି ଲୋକମାନେ ଏଣେ ତେଣେ ମୋବାଇଲକୁ ପକାଉଥିବାରୁ ସେମାନଙ୍କୁ ଶିକ୍ଷା ଦେବାକୁ ପୋଲିସ ଏପରି କରିଛି । ହେଲେ ଲୋକମାନେ ଆମକୁ ଭୁଲ ଭାବୁଛନ୍ତି ।
ତେବେ ବାଲେଶ୍ୱର ସାଂସଦ ତଥା ମନ୍ତ୍ରୀ ପ୍ରତାପ ସଢଙ୍ଗୀ ଏହି ଘଟଣାକୁ ନିନ୍ଦା କରିବା ସହ ଏହାର ତଦନ୍ତ ପାଇଁ ସିଡିଏମଓଙ୍କୁ ସୁପାରିସ୍ କରିଛନ୍ତି ।
