କଙ୍ଗନାଙ୍କ ଟ୍ୱିଟର ଆକାଉଣ୍ଟ ସସପେଣ୍ଡ

ମୁମ୍ବାଇ (ବଡ଼ ଖବର ବ୍ୟୁରୋ): ପୁଣି ଥରେ ଚର୍ଚ୍ଚାରେ ବଲିଉଡ ଅଭିନେତ୍ରୀ କଙ୍ଗନା । କଙ୍ଗନାଙ୍କୁ ଲାଗିଛି ଏବେ ଶକ୍ତ ଝଟକା । ଆଜି ତାଙ୍କ ଟ୍ୱିଟର ଆକାଉଣ୍ଟ ସ୍ଥାୟୀ ଭାବେ ସସପେଣ୍ଡ କରି ଦିଆଯାଇଛି । ଭାରତୀୟ ସେଲେବ୍ରିଟିଙ୍କ ଟ୍ୱିଟର ଆକାଉଣ୍ଟ ସ୍ଥାୟୀ ଭାବେ ସସପେଣ୍ଡ ହେବା ଏହା ପ୍ରଥମ ଘଟଣା। ସେ ସୋସିଆଲ ମିଡିଆରେ ବିବାଦୀୟ ଓ ଉତ୍ତେଜନା ସୃଷ୍ଟି କରିବା ଭଳି ବୟାନ ଦେଇଥିବାରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ସବୁବେଳେ ବିବାଦୀୟ ମନ୍ତବ୍ୟ ଦେଇ ଅଭିନେତ୍ରୀ କଙ୍ଗନା ଚର୍ଚ୍ଚାରେ ରହିଥାନ୍ତି ।

ସୂଚନା ଅନୁଯାୟୀ, ପଶ୍ଚିମବଙ୍ଗରେ ବିଜେପି ହାରିବା ଓ ମମତା ବାନାର୍ଜୀ ଜିତିବା ଘଟଣାକୁ ନେଇ କଙ୍ଗନା ସହଜରେ ସହି ପାରି ନଥିଲେ। ଯେଉଁଥିପାଇଁ ସେ ମମତାଙ୍କୁ ଟାର୍ଗେଟ କରି ଏକାଧିକ ବିବାଦୀୟ ଓ ଆପତ୍ତିଜନକ ଟ୍ୱିଟ କରିଥିଲେ। ଉଭୟ ଟିଏମସି ଓ ବିଜେପି ପରସ୍ପରକୁ ଏଥିପାଇଁ ଦାୟୀ କରୁଛନ୍ତି। ସେପଟେ ସେ ହିଂସାକାଣ୍ତ ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ସିଧାସଳଖ ଦାୟୀ କରି ଟ୍ୱିଟର ଗାଇଡଲାଇନ ଭୁଲି ଆପତ୍ତିଜନକ ପୋଷ୍ଟ କରିଥିଲେ। ଏଥିପାଇଁ ତାଙ୍କ ଆକାଉଣ୍ଟକୁ ସସପେଣ୍ଡ କରିଦିଆଯାଇଥିବା ଜଣାପଡ଼ିଛି।