ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦେଶରେ ଏବେ କରୋନାର ଦ୍ୱିତୀୟ ଲହର ଲାଗି ରହିଛି । ଦ୍ୱିତୀୟ ଲହର ନଯାଉଣୁ ଏବେ ତୃତୀୟ ଲହର ସଂକ୍ରମଣ ନେଇ ସତର୍କ କରାଇଲେଣି ବୈଜ୍ଞାନିକ । ଦେଶରେ ତୃତୀୟ ଲହର ଆସିବ । ଏହାର ମୁକବିଲା ପାଇଁ ସରକାର ପ୍ରସ୍ତୁତ ରୁହନ୍ତୁ ବୋଲି ସରକାରଙ୍କ ପ୍ରମୁଖ ବୈଜ୍ଞାନିକ ପରାମର୍ଶଦାତା କେ ବିଜୟ ରାଘବନ କହିଛନ୍ତି । କେଉଁ ସମୟରେ ତୃତୀୟ ଲହର ସଂକ୍ରମଣ ଆସିବ ସେନେଇ କୌଣସି ନିର୍ଦ୍ଦିଷ୍ଟ ସମୟ ଜଣା ନାହିଁ । କିନ୍ତୁ ଏଥିପାଇଁ ଆମକୁ ଆଗରୁ ସଚେତନ ହେବାକୁ ପଡ଼ିବ ବୋଲି କହିଛନ୍ତି ବିଜୟ ରାଘବନ । ତେବେ ଦ୍ୱିତୀୟ ଲହର ଏତେ ଲମ୍ବା ଓ ଭୟାନକ ହେବ ବୋଲି କେହି ଅନୁମାନ ମଧ୍ୟ କରିନଥିଲେ । ତେଣୁ ତୃତୀୟ ଲହର କେଉଁ ପରିସ୍ଥିତିରେ ଓ କେତେ ଭୟାନକ ରହିବ ତାହାର ଅନୁମାନ କରିବା କଷ୍ଟ ।
ବୁଧବାର ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ, ଦ୍ୱିତୀୟ ଲହରରେ ଭାଇରସ ଅତି ମାତ୍ରାରେ ସଂକ୍ରାମକ ହୋଇ ଉଠିଛି । ସଂକ୍ରମଣ ବଢ଼ାଉଥିବା ଏହି ନୂଆ ପ୍ରଜାତିକୁ ନିୟନ୍ତ୍ରଣ କରିବାପାଇଁ ଟିକାର ମଧ୍ୟ ପରିବର୍ତ୍ତନ ଆଣିବାକୁ ପଡ଼ିବ । ବ୍ରିଟେନ ପ୍ରଜାତିର ଭୂତାଣୁ କମୁଥିବା ବେଳେ ଭାରତୀୟ ପ୍ରଜାତିର ସଂକ୍ରମଣ ବଢ଼ିବାରେ ଲାଗିଛି । ତେବେ ନୂଆ ପ୍ରଜାତିର ସଂକ୍ରମଣ ପାଇଁ ଟିକା ଫଳପ୍ରଦ ହୋଇଛି । ସମଗ୍ର ବିଶ୍ୱରେ ପୁଣି ନୂଆ ପ୍ରଜାତିର ଭୂତାଣୁ ସୃଷ୍ଟି ହେବ ତାକୁ ମାତ ଦେବାକୁ ଟିକାକୁ ଆହୁରି ପ୍ରଭାବି କରିବାକୁ ପଡ଼ିବ । ଭାରତ ସମେତ ସମଗ୍ର ବିଶ୍ୱର ବୈଜ୍ଞାନକ ମାନେ ଏବେ ଏହି ଦିଗରେ ଦିନ ରାତି କାର୍ଯ୍ୟ କରୁଛନ୍ତି ।
