ବର ଗୁଟୁଖା ଚୋବାଉଥିବା ଦେଖି କନିଆଁ ବାହାଘର ଭାଙ୍ଗିଦେଲା
ଲକ୍ଷ୍ନୌ (ବଡ଼ ଖବର ବ୍ୟୁରୋ): ପାନ-ମସଲା ଖାଇବା କେବଳ ସ୍ୱାସ୍ଥ୍ୟ ପାଇଁ କ୍ଷତିକାରକ ନୁହେଁ ବରଂ ବିବାହ ପାଇଁ ମଧ୍ୟ କ୍ଷତିକାରକ । ଏଭଳି ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ବାଲିଆ ଜିଲ୍ଲାରେ । ବିବାହ କାର୍ଯ୍ୟକ୍ରମ ୫ ଜୁନରେ ଥିଲା । ବର ବି କନିଆଁ ଘରକୁ ରୋଷଣି କରି ପହଞ୍ଚି ସାରିଥିଲା । ଠିକ ଏତିକି ବେଳେ କନିଆଁ ଦେଖିଲେ ଯେ, ତାଙ୍କର ହେବାକୁ ଥିବା ବର ମଦ୍ୟ ପାନ କରି, ଗୁଟଖା ଚୋବାଉଛି । ଏହା ଦେଖି କନିଆଁ ଜଣକ ବିବାହ କରିବାକୁ ମନା କରି ଦେଇଥିଲେ ।
ଖବର ପାଇ ଘଟଣାସ୍ଥଳରେ ସ୍ଥାନୀୟ ଅଞ୍ଚଳର ପୋଲିସ ପହଞ୍ଚିଥିଲା । ସ୍ଥାନୀୟ ପୋଲିସ ଷ୍ଟେସନ ଦାୟିତ୍ୱରେ ଥିବା ଶୈଳେନ୍ଦ୍ର ସିଂ କହିଛନ୍ତିି, ମିସୁରୁଲି ଗାଁରେ ଜଣେ ଝିଅର ବିବାହ କେଜୁଣୀ ଗାଁର ଜଣେ ଯୁବକଙ୍କ ସହ ହେବାକୁ ସ୍ଥିର ହୋଇଥିଲା । ବରର ଗୁଟଖା ଓ ମଦ ପିଆକୁ ଦେଖି ଝିଅ ଜଣକ ବିବାହ କରିବାକୁ ମନା କରି ଦେଇଥିଲେ । ବିବାହ ରଦ୍ଦ ହେବା ପରେ ଉଭୟ ପରିବାର ମଧ୍ୟ ପରସ୍ପରକୁ ଦେଇଥିବା ଉପହାର ଫେରସ୍ତ କରିବାକୁ ନିଷ୍ପତ୍ତି ନେଇଛନ୍ତି ।