ଆଜି ସଜେଇ ହେବେ ରସିକନାଗର

ପୁରୀ (ବଡ଼ ଖବର ବ୍ୟୁରୋ): ଶ୍ରୀମନ୍ଦିରର ରତ୍ନସିଂହାସନ ଶୂନ୍ୟ । ନାହାନ୍ତି ମହାପ୍ରଭୁ ଶ୍ରୀଜଗନ୍ନାଥ । କିଛି ନ’କହି ଭାଇ-ଭଉଣୀଙ୍କ ସହିତ ଚାଲିଯାଇଛନ୍ତି ମାଆ ଗୁଣ୍ଡିଚାଙ୍କ ଘରକୁ । ମାଆ ଲକ୍ଷ୍ମୀ ସାଆନ୍ତାଣୀ ଅଭିମାନରେ ବସି ରହିଛନ୍ତି । ବିତିଗଲାଣି ଦୀର୍ଘ ଚାରି ଦିନ । ଆଉ ରହି ହେଉନାହିଁ କି ସହି ହେଉନାହିଁ । କିଛି ଗୋଟେ କରିବାକୁ ହେବ । ଆସନ୍ତାକାଲି ସାଆନ୍ତଙ୍କୁ ଭେଟିବାକୁ ଗୁଣ୍ଡିଚା ମନ୍ଦିର ଆସିବେ ସାଆନ୍ତାଣୀ । ଏ ଖବର ମଧ୍ୟ ପହଞ୍ଚି ସାରିଲାଣି ବ୍ରହ୍ମାଣ୍ଡ ଠାକୁରଙ୍କ ପାଖରେ।

ଠାକୁରାଣୀ ପହଞ୍ଚିବା ପୂର୍ବରୁ ଆଜି ବନକଲାଗି ହୋଇ ସଜେଇ ହେବେ ରସିକନାଗର। ତେବେ ଏହି ପରମ୍ପରା ଅନୁଯାୟୀ ଆଜି ସଂଧ୍ୟା ଧୂପ ପରେ ମହାପ୍ରଭୁଙ୍କ ବନକଲାଗି ନୀତି ଆରମ୍ଭ ହେବ। ଶ୍ରୀଜିଉଙ୍କ ଶ୍ରୀମୁଖ ଶୃଙ୍ଗାରରେ କସ୍ତୁରୀ, କେଶର, ହରତାଳ, ହିଂଗୁଳ ଆଦିର ମିଶ୍ରଣକୁ ଲାଗି କରାଯାଇ ବନକଲାଗି ଜରିଆରେ ଏହି ନୀତିକୁ ଶେଷ ସ୍ପର୍ଶ ଦିଆଯିବ। ପ୍ରାୟ ୬ ଘଣ୍ଟା ଧରି ବନକଲାଗି ନୀତି ଅନୁଷ୍ଠିତ ହେବ। ଦତ୍ତ ମହାପାତ୍ର ସେବକମାନେ ମହାପ୍ରଭୁଙ୍କ ଏହି ବିଶେଷ ନୀତି ସମ୍ପାଦନ କରିବେ ।