ମୁଖ୍ୟମନ୍ତ୍ରୀ ଭାବେ ଆଜି ଶପଥ ନେବେ ବୋମାଇ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): କର୍ଣ୍ଣାଟକ ମୁଖ୍ୟମନ୍ତ୍ରୀ ପଦରୁ ବି.ଏସ୍. ୟେଦ୍ୟୁରପ୍ପାଙ୍କ ଇସ୍ତଫା ପରେ ତାଙ୍କ ଉତ୍ତରାଧିକାରୀ କିଏ ହେବ ବୋଲି ଚାଲିଥିବା କଳ୍ପନାଜଳ୍ପନାର ଅବସାନ ଘଟିଛି । ଲିଙ୍ଗାୟତ ସଂପ୍ରଦାୟର ଟାଣୁଆ ନେତା ତଥା ୟେଦ୍ୟୁରପ୍ପା ସରକାରରେ ଗୃହମନ୍ତ୍ରୀ ବସବରାଜ ବୋମାଇ କର୍ଣ୍ଣାଟକର ନୂଆ ମୁଖ୍ୟମନ୍ତ୍ରୀ ହୋଇଛନ୍ତି । ବିଏସ୍ ୟେଦ୍ୟୁରପ୍ପା ସୋମବାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ମଙ୍ଗଳବାର ନୂଆ ନେତା ଚୟନ ହୋଇଥିଲା ।
ଏଥିପାଇଁ ବିଜେପି ବିଧାୟକ ଦଳର ବୈଠକ ବେଙ୍ଗାଲୁରୁରେ ଅନୁଷ୍ଠିତ ହୋଇଥିଲା। ବୈଠକରେ ସର୍ବସମ୍ମତିକ୍ରମେ ବିଧାୟକ ଦଳ ନେତା ଭାବେ ବସବରାଜ ର୍ନିବାଚିତ ହୋଇଥିଲେ । ବସବରାଜ ବୁଧବାର ଅପରାହ୍ନ ୩ଟା ୨୦ରେ ରାଜଭବନରେ ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ । ବିଧାୟକ ଦଳ ବୈଠକ ପୂର୍ବରୁ ଦଳର ସମସ୍ତ ବରିଷ୍ଠ ନେତାମାନଙ୍କ ସହ ଦଳର ପର୍ଯ୍ୟବେକ୍ଷକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ କେନ୍ଦ୍ରମନ୍ତ୍ରୀ କିସନ୍ ରେଡ୍ଡୀ ଆଗୁଆ ଆଲୋଚନା କରିଥିଲେ।
ମୁଖ୍ୟମନ୍ତ୍ରୀ ଭାବେ ମନୋନୀତ ବସବରାଜଙ୍କ ଜନ୍ମ ୧୯୬୦ ଜାନୁଆରି ୨୮ରେ ହୋଇଥିଲା । ସେ କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଏସ୍. ଆର୍. ବୋମାଇଙ୍କ ପୁଅ। ସେ ବିଜେପିରେ ୨୦୦୮ରେ ସାମିଲ ହୋଇଥିଲେ।