ସିଦ୍ଧୁ ଦେଲେ ଇସ୍ତଫା, କ୍ୟାପଟେନ ହେବେ କି ସଭାପତି?

ଚଣ୍ଡିଗଡ଼ (ବଡ଼ ଖବର ବ୍ୟୁରୋ): ପଞ୍ଜାବ କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେଲେ ନବଜୋତ ସିଂ ସିଦ୍ଧୁ । ମାତ୍ର ୭୨ ଦିନ ଅଧ୍ୟକ୍ଷ ପଦରେ ରହିବା ପରେ ସିଦ୍ଧୁ ଇସ୍ତଫା ଦେଇଛନ୍ତି । ଇସ୍ତଫାର କାରଣ ସମ୍ପୂର୍ଣ୍ଣ ସ୍ପଷ୍ଟ ହୋଇନଥିବା ବେଳେ ସିଦ୍ଧୁ କହିଛନ୍ତି ପଞ୍ଜାବର ଭବିଷ୍ୟତ ସହ କୌଣସି ସାଲିସ କରିପାରିବି ନାହିଁ । ତେଣୁ ଇସ୍ତଫା ଦେଉଛି । ତେବେ ଆଗକୁ କଂଗ୍ରେସ ଦଳ ସହିତ କାର୍ଯ୍ୟ ଜାରି ରଖିବି । ଜୁଲାଇ ୧୮ ତାରିଖରେ ପଞ୍ଜାବର ପିସିସି ସଭାପତି ହୋଇଥିଲେ ସିଦ୍ଧୁ । କିନ୍ତୁ ହଠାତ ଇସ୍ତଫା ଦେବାକୁ ନେଇ ଏବେ ରାଜନୈତିକ ଚର୍ଚ୍ଚା ଲାଗି ରହିଛି ।

ସେପଟେ କିଛି ଦିନ ଆଗରୁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବା କ୍ୟାପଟେନ ଅମରିନ୍ଦର ସିଂ ବିଜେପିରେ ମିଶି ପାରନ୍ତି । ଦଳରେ ଦୁହିଁଙ୍କ ମଧ୍ୟରେ ବିବାଦ ଲାଗି ରହିଥିଲା । କ୍ୟାପଟେନଙ୍କ ଇସ୍ତଫା ପରେ ଏହା କମିବା ନେଇ ଚର୍ଚ୍ଚା ହେଉଥିଲେ ମଧ୍ୟ ଏହାର ବ୍ୟତିକ୍ରମ ଘଟିଛି । ସିଦ୍ଧୁ ଆଜି ନିଜ ଇସ୍ତଫା ପତ୍ର ସୋନିଆ ଗାନ୍ଧିଙ୍କୁ ପଠାଇ ଦେଇଛନ୍ତି । ଯାହାକୁ ନେଇ ଏବେ ସରଗରମ ହୋଇଛି ପଞ୍ଜାବ ରାଜନୀତି । ତେବେ କ୍ୟାପଟେନ ସନ୍ଧ୍ୟାରେ ଗୃହମନ୍ତ୍ରୀ ଅମିତ ଶାହ ଏବଂ ଜେପି ନଡ୍ଡାଙ୍କୁ ଭେଟିବେ ।

ଏହା ପୂର୍ବରୁ କ୍ୟାପଟେନଙ୍କୁ ଦଳର ସଭାପତି କରି ମାଷ୍ଟର ଷ୍ଟ୍ରୋକ ଖେଳିପାରେ କଂଗ୍ରେସ । ତେବେ ପଞ୍ଜାବ ମନ୍ତ୍ରିମଣ୍ଡଳରେ ମନ୍ତ୍ରୀଙ୍କ ନାଁ ଧାର୍ଯ୍ୟ ହେବା ସମୟରେ ରାହୁଲ ଗାନ୍ଧି ଚରଣଜୀତ ଚନ୍ନୀଙ୍କ ସହ କଥା ହୋଇ ନିଷ୍ପତ୍ତି ନେଇଥିଲେ। ସିଦ୍ଧୁଙ୍କୁ କେଉଁଠି ବି ସାମିଲ କରାଯାଇ ନଥିଲା । ଯେଉଁ କାରଣରୁ ସିଦ୍ଧୁ କଂଗ୍ରେସ ସଭାପତି ପଦରୁ ଇସ୍ତଫା ଦେଇଥିବା କୁହାଯାଉଛି ।