ଭୁବନେଶ୍ୱର(ବଡ଼ ଖବର ବ୍ୟୁରୋ): ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ପଦକ ବିଜେତା ହକି ଟିମର ସଦସ୍ୟ ରହିଥିବା ଓଡିଆ ପୁଅ ବୀରେନ୍ଦ୍ର ଲାକ୍ରା ହକି ଟିମରୁ ଅବସର ଘୋଷଣା କରିଛନ୍ତି । ତେବେ ୩୧ ବର୍ଷୀୟ ଲାକ୍ରା ୨୦୧ ମ୍ୟାଚରେ ଭାରତର ପ୍ରତିନିଧିତ୍ୱ କରିଛନ୍ତି । ବୀରେନ୍ଦ୍ରଙ୍କ ଅବସର ନେଇ ହକି ଟିମ ଇଣ୍ଡିଆ ଟ୍ୱିଟ କରି ସୂଚନା ଦେଇଛି । ଲାକ୍ରା ହକି ଟିମର ଷ୍ଟାର ଡିଫେଣ୍ଡର ଥିଲେ । ସେ ଦୁଇଥର ଭାରତ ପକ୍ଷରୁ ଅଲିମ୍ପିକ୍ସରେ ପ୍ରତିନିଧିତ୍ୱ କରିଛନ୍ତି । ସେ ଗତ ୨୦୧୨ ଲଣ୍ଡନ ଅଲିମ୍ପିକ୍ସରେ ଭାରତୀୟ ଦଳ ପାଇଁ ଖେଳିଥିବା ବେଳେ ୨୦୧୬ରେ ଅଲିମ୍ପିକ୍ସ ପାଇଁ ଚୟନ ହୋଇଥିଲେ ହେଁ ଆହତ କାରଣରୁ ଖେଳି ନଥିଲେ ।
ତେବେ ଚଳିତ ବର୍ଷ ୨୦୨୧ ଟୋକିଓ ଅଲିମ୍ପିକ୍ସରେ ତାଙ୍କୁ ଭାରତୀୟ ହକି ଟିମରେ ସାମିଲ କରାଯାଇଥିଲା । ଆଉ ପରେ ଟୋକିଓରେ ଭାରତୀୟ ଦଳ ବ୍ରୋଞ୍ଜ ପଦକ ଜିତି ଦୀର୍ଘ ୪୨ ବର୍ଷ ପରେ ସ୍ୱର୍ଣ୍ଣିମ ଇତିହାସ ରଚିଥିଲା । ଅଲିମ୍ପିକ୍ସରେ ବିରେନ୍ଦ୍ର ଲାକ୍ରାଙ୍କର ଅବଦାନ ଅତୁଳନୀୟ ରହିଥିଲା । ତେବେ ବୀରେନ୍ଦ୍ର ହକିରୁ ଅବସର ଘୋଷଣା କରିବା ପରେ ହକି ପାଇଁ ଏହା ଏକ ଅପୂରଣୀୟ କ୍ଷତି କହିଲେ କିଛି ଭୁଲ ହେବ ନାହିଁ ।
