ସମ୍ବଲପୁର (ବଡ଼ ଖବର ବ୍ୟୁରୋ): ଜଳ ହିଁ ଜୀବନ । ଏହି ଭାବଧାରା ନେଇ କେନ୍ଦ୍ର ଓ ରାଜ୍ୟ ସରକାର କାର୍ଯ୍ୟକାରୀ କରୁଛନ୍ତି ବିଭିନ୍ନ ଯୋଜନା । ରାଜକୋଷରୁ ଖର୍ଚ୍ଚ ହେଉଛି ପାଣିଭଳି ଟଙ୍କା । ସାଧାରଣ ଟିକସଦାତାଙ୍କଠାରୁ ଆସୁଥିବା ଏହି ଟଙ୍କାର ସିଂହଭାଗ ସରକାରୀ ବାବୁ ଓ ରାଜନେତାଙ୍କ ବିଳାସବ୍ୟସନରେ ଉଡ଼ିଯାଉଛି । ଯେଉଁମାନଙ୍କ ପାଇଁ ଏତେ ଯୋଜନା ସେମାନେ ହନ୍ତସନ୍ତ ହେବା ସାର ହେଉଛି । ଏକଥା ଆମେ କହୁନୁ ସମ୍ବଲପୁର ମହାନଗର ନିଗମର ମାନେଶ୍ୱର ଅଞ୍ଚଳର ଲୋକେ କହୁଛନ୍ତି । ପ୍ରଶାସନିକ ଇଚ୍ଛାଶକ୍ତିର ଅଭାବରୁ ଏହି ଅଞ୍ଚଳର ଲୋକମାନେ ପିଇବା ପାଣି ପାଇଁ ଏମେ ମଧ୍ୟ ହନ୍ତସନ୍ତ ହେଉଛନ୍ତି ।
ସମ୍ବଲପୁର ମହାନଗର ନିଗମ ୪୦ନଂ ୱାର୍ଡର ମାନେଶ୍ୱର ଅଞ୍ଚଳ । ଲୋକଙ୍କୁ ସୁବିଧାରେ ପିଇବା ପାଣି ମିଳିବା ଦିବାସ୍ୱପ୍ନ ହୋଇପଡିଛି । ଲୋକେ ଲମ୍ବାଧାଡ଼ିରେ ଛିଡାହୋଇ ନଳକୂଅରୁ ପିଇବା ପାଣି ସଂଗ୍ରହ କରୁଛନ୍ତି । ସରକାରଙ୍କ ଅମୃତ ଧାରା ଯୋଜନା ଏଠି ବାଟବଣା ହୋଇଥିବା ସାଧାରଣ ଲୋକେ କହୁଛନ୍ତି । ତିନିବର୍ଷ ହେଲା ଅସମ୍ପୂର୍ଣ୍ଣ ହୋଇ ପଡିରହିଛି ଏହି ପ୍ରକଳ୍ପ । ଲୋକଙ୍କ ବାରମ୍ବାର ଅଭିଯୋଗ ପରେ ତିନିବର୍ଷ ପୂର୍ବେ ମାନେଶ୍ୱର ଅଞ୍ଚଳରେ ପିଇବା ପାଣି ଯୋଗାଇବା ପାଇଁ ପ୍ରକଳ୍ପ ଆରମ୍ଭ କରାଯାଇଥିଲା । ପାଇପ ବିଛା ହୋଇସାରିଛି,ହେଲେ ପାଣିର ଦେଖାନାହିଁ ।
