ଆସ୍କା (ବଡ଼ ଖବର ବ୍ୟୁରୋ): ଗଞ୍ଜାମ ଜିଲ୍ଲା ଆସିକା ଋଷକୁଲ୍ୟା ନଦୀ ଓ ବଡନଦୀ ସଙ୍ଗମ ସ୍ଥଳରେ ପିତୃପୁରଷଙ୍କ ଆତ୍ମାକୁ ଶାନ୍ତି ପାଇଁ ପବିତ୍ର ସ୍ନାନ ସାରି ଅସ୍ଥି ବିସର୍ଜନ କରି ଫେରିବା ବେଳେ ଦୁର୍ଘଟଣାର ସମ୍ମୁଖୀନ ହେଲେ ଜଣେ ବୃଦ୍ଧା । ସେ ହେଲେ ବ୍ରହ୍ମପୁର ଜଗଦଳପୁର ଅଚଂଳର ଶୈଳ ଡାକୁଆ । ଶୈଳ ଆଜି ସକାଳୁ ଋଷିକୁଲ୍ୟା ସଙ୍ଗମ ସ୍ଥଳକୁ ଅସ୍ଥି ବିସର୍ଜନ ପାଇଁ ଆସିଥିଲେ । ପୂଜା ପାଠ ସାରି ନଦୀରେ ସ୍ନାନ ପରେ ଅସ୍ଥି ବିସର୍ଜନ କରିଥିଲେ ।
ଏହାପରେ ନିଜ ଗ୍ରାମକୁ ଫେରିବା ସମୟରେ ଆସିକା ପଲ୍ଲୀଛକ ସ୍ଥିତ ପୋଷ୍ଟମର୍ଟମ ଛକ ଠାରେ ଏକ ଟ୍ରକ ସହ ଧକ୍କା ହୋଇଥିଲେ । ଏଥିରେ ବୃଦ୍ଧା ଜଣକ ପଛ ଛକ ତଳେ ପଡିଯାଇଥିଲେ । ଯଦ୍ୱାରା ଟ୍ରକର ଚକଟି ତାଙ୍କ ଗୋଡ ଉପରେ ମାଡି ଚାଲିଯାଇଥିଲା । ବୃଦ୍ଧା ଜଣକ ତଳେ ପଡି ରକ୍ତ ଜୁଡୁବୁଡୁ ଅବସ୍ଥାରେ ସଂଜ୍ଞାହୀନ ହୋଇ ପଡି ଯାଇଥିଲେ । ସଙ୍ଗେ ସଙ୍ଗେ ସ୍ଥାନୀୟ ପୋଲିସ ଓ ଉପସ୍ଥିତ ଜନସାଧାରଣଙ୍କ ସହାୟତାରେ ଆସିକା ମେଡିକାଲକୁ ଅଣାଯାଇଥିଲା ।
ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କ ଅବସ୍ଥା ଗୁରୁତର ଥିବାରୁ କାର୍ଯ୍ୟରତ ଡାକ୍ତର ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତିରିତ କରିଥିବା ଜଣାଯାଇଛି । ସେପଟେ ଦୁର୍ଘଟଣା ଘଟାଇଥିବା ଟ୍ରକକୁ ଆସିକା ପୋଲିସ ଜବତ କରିଥିବା ବେଳେ ଡ୍ରାଇଭରକୁ ଥାନାରେ ଅଟକ ରଖାଯାଇଥିବା ସୂଚନା ମିଳିଛି ।
