ନ୍ୟାୟ ମାଗୁଛି ନାବାଳିକା

ରେଙ୍ଗାଲୀ (ବଡ଼ ଖବର ବ୍ୟୁରୋ): ଦୁହେଁ ନାବଳକ । ଖେଳିବା ବୁଲିବା ବୟସରେ ପ୍ରେମ । ପୁଣି ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ । ଏବେ ଗର୍ଭବତୀ ପ୍ରେମିକା ମାଗୁଛି ନ୍ୟାୟ । ଏଭଳି ଅଭିଯୋଗ ଆସିଛି ସମ୍ବଲପୁର ଜିଲ୍ଲା ରେଙ୍ଗାଲୀ ବ୍ଳକ କତରବଗା ଥାନା ଥପାପାଲି ଅଞ୍ଚଳରୁ । ଥପାପାଲି ଗାଁର ଜଣେ ନାବାଳିକାଙ୍କ ସହ ବନ୍ଧଟିକ୍ରା ଗାଁର ଜଣେ ନାବାଳକଙ୍କ ମଧ୍ୟରେ ଘଟିଛି ଏଭଳି ଲଜ୍ଜାଜନକ ଘଟଣା ।

ଦୀର୍ଘଦିନ ହେବ ଉଭଙ୍କ ମଧ୍ୟରେ ଥିଲା ପ୍ରେମ ସମ୍ପର୍କ । ନାବାଳିକ ଜଣକ ଏବେ ଗର୍ଭବତୀ । ଲଜ୍ଜାରୁ ମୁକ୍ତି ପାଇବା ଲାଗି ବିବାହ କରିବା ଲାଗି ପ୍ରେମିକା ଦେଇଥିବା ପ୍ରସ୍ତାବ ଗ୍ରହଣ କରିନାହିଁ ନାବାଳକ ପ୍ରେମିକ । ବିବାହ ବୟସ ହୋଇନାହିଁ କହି ପ୍ରେମିକାଙ୍କୁ ଫାଙ୍କି ଦେବାକୁ ବସିଛି ପ୍ରେମିକ । ପ୍ରେମିକଙ୍କ ପରିବାରକୁ ପ୍ରେମିକାଙ୍କ ପରିବାର ବିନତି କରିଥିଲେ ମଧ୍ୟ ସେମାନେ ଶୁଣିବାକୁ ନାରାଜ । ଶେଷରେ କିଛି ଉପାୟ ନପାଇ ନାବାଳିକାଙ୍କ ପରିବାର ନ୍ୟାୟ ଲାଗି ଥାନାରେ ଅଭିଯୋଗ କରିଛନ୍ତି । ପୋଲିସ ଏକ ମାମଲା ରୁଜୁ କରି ଉଭୟଙ୍କ ଡ଼ାକ୍ତରୀ ମାଇନା ଲାଗି ପଠାଯାଇଛି । ଅଭିଯୁକ୍ତ ନାବାଳକର ଡାକ୍ତରୀ ମାଇନା ରିପୋର୍ଟ ଆସିବା ପରେ ଜୁଭେନାଇଲ ଜଷ୍ଟିସ ବୋର୍ଡ଼ରେ ହାଜର କରାଯାଇଛି ।