‘ଯିଏ ସ୍ୱର ଉତ୍ତୋଳନ କରେ ବିଜେପି ସେମାନଙ୍କୁ ଭୟ କରେ’
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆମ ଆଦମୀ ପାର୍ଟି ଏମ୍ପି ସଞ୍ଜୟ ସିଂଙ୍କୁ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଗିରଫ କରିଛି। ଦିଲ୍ଲୀ ମଦ ଦୁର୍ନୀତି ସହ ଜଡିତ ମନି ଲଣ୍ଡରିଂ ମାମଲାରେ ଇଡି ଗତକାଲି ଚଢାଉ କରିଥିଲା। ଦୀର୍ଘ ୧୦ ଘଣ୍ଟା ପଚରାଉଚରା ପରେ ତାଙ୍କୁ ଇଡି ଗିରଫ କରିଥିଲା। ଆଜି ସାଂସଦ ସଞ୍ଜୟ ସିଂ ରାଉସ୍ ଆଭେନ୍ୟୁ କୋର୍ଟରେ ହାଜର ହେବେ। କୋର୍ଟରେ ଇଡି କୋର୍ଟଙ୍କୁ କହିବେ ଯେ ପଚରାଉଚରା ସମୟରେ ସଞ୍ଜୟ ସିଂ ସହଯୋଗ କରିନାହାଁନ୍ତି, ତେଣୁ ତାଙ୍କୁ ଗିରଫ କରାଯାଇଛି। ସଞ୍ଜୟ ସିଂଙ୍କ ରିମାଣ୍ଡରେ ନେବାକୁ ଇଡି ଦାବି କରିବ। ପ୍ରଶ୍ନଗୁଡିକର ଏକ ଲମ୍ବା ତାଲିକା ଅଛି । ଯାହାର ଉତ୍ତର ସଞ୍ଜୟ ସିଂଙ୍କଠାରୁ ନିଆଯିବ। ସମାନ ପ୍ରଶ୍ନ ଦର୍ଶାଇ ଇଡି ରିମାଣ୍ଡରେ ନେବାକୁ ଦାବି କରିବ।
ଇଡି ପୂର୍ବରୁ ତାଙ୍କ କର୍ମଚାରୀ ଏବଂ ଏହି ମାମଲାରେ ତାଙ୍କ ସହ ଜଡିତ ଅନ୍ୟ ଲୋକଙ୍କୁ ପଚରାଉଚରା କରିଥିଲା। ସଞ୍ଜୟ ସିଂଙ୍କ ଗିରଫଦାରୀ ବିରୋଧରେ ଆମ ଆଦମୀ ପାର୍ଟି ବିରୋଧ କରୁଛି। ସୂଚନାନୁସାରେ, କେନ୍ଦ୍ରୀୟ ଏଜେନ୍ସି ସଞ୍ଜୟ ସିଂଙ୍କୁ ଗୁରୁବାର କୋର୍ଟରେ ଉପସ୍ଥାପନ କରିବ। ଏହାପରେ ଆପ ମୁଖ୍ୟ ଅରବିନ୍ଦ କେଜ୍ରିୱାଲ ଦିଲ୍ଲୀ ସ୍ଥିତ ସାଂସଦଙ୍କ ଘରକୁ ଯାଇ ପରିବାର ଲୋକଙ୍କୁ ଭେଟିଥିଲେ । ଏହାପରେ ଗଣମାଧ୍ୟମ ଆଗରେ କହିଥିଲେ, ବିଜେପି ୨୦୨୪ ନିର୍ବାଚନ ହାରୁଥିବା ଜାଣିବା ପରେ ହତାଶ ହୋଇ ଏଭଳି କାର୍ୟ୍ୟାନୁଷ୍ଠାନ ଗ୍ରହଣ କରୁଛି । ଏହାର ପ୍ରତିବାଦରେ ଆଜି ଦିଲ୍ଲୀ ସ୍ଥିତ ବିଜେପି ମୁଖ୍ୟ କାର୍ୟ୍ୟାଳୟ ସମ୍ମୁଖରେ ଆମ ଆଦମୀ ପାର୍ଟି ପକ୍ଷରୁ ବିକ୍ଷୋଭ କରାଯିବ ବୋଲି ସୂଚନା ରହିଛି ।
ସେପଟେ ଏମ୍ପି ସଞ୍ଜୟ ସିଂଙ୍କ ଗିରଫ ପରେ ଆମ ଆଦମୀ ପାର୍ଟିର ପ୍ରଥମ ପ୍ରତିକ୍ରିୟା ଆସିଛି। ବିନା ପ୍ରମାଣରେ ସଞ୍ଜୟ ସିଂଙ୍କୁ ଗିରଫ କରାଯାଇଥିବା ଦିଲ୍ଲୀ ମନ୍ତ୍ରୀ ସୌରଭ ଭରଦ୍ୱାଜ କହିଛନ୍ତି। ଗତ କିଛି ସପ୍ତାହ ମଧ୍ୟରେ କେନ୍ଦ୍ର ସରକାରଙ୍କ ପ୍ରତି ଜନସାଧାରଣଙ୍କ ମଧ୍ୟରେ ଅତ୍ୟଧିକ ନକାରାତ୍ମକତା ଦେଖାଦେଇଛି। ଜନସାଧାରଣ ବିଜେପିକୁ ଶାସନ ଗାଦିକୁ ଫେରାଇ ଆଣିବାକୁ ପ୍ରସ୍ତୁତ ନୁହଁନ୍ତି। ସେପଟେ ଦିଲ୍ଲୀ ମନ୍ତ୍ରୀ ଆତିଶୀ କହିଛନ୍ତି ଯେ, ଗତ ଏକ ବର୍ଷ ଧରି କେନ୍ଦ୍ରୀୟ ଏଜେନ୍ସିଗୁଡ଼ିକ କେବଳ ଏଏପି ଦୁର୍ନୀତିର ଏକ ଟଙ୍କା ମଧ୍ୟ ପାଇବା ପାଇଁ କାର୍ଯ୍ୟ କରୁଛନ୍ତି, କିନ୍ତୁ ତାହା ମିଳିପାରି ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଞ୍ଜୟ ସିଂଙ୍କୁ ଭୟ କରୁଥିବାରୁ ସଞ୍ଜୟ ସିଂଙ୍କୁ ଗିରଫ କରାଯାଇଛି। ଯିଏ ସ୍ବର ଉତ୍ତୋଳନ କରନ୍ତି ସେମାନଙ୍କୁ ବିଜେପି ଭୟ କରେ।
