https://youtube.com/live/XG0zCcOwqRk?feature=share
ଭୁବନେଶ୍ୱର (ବଡ଼ ଖବର ବ୍ୟୁରୋ): ଜଲୱା ଦେଖାଉଛି ବିଜେପି । ତିନି ରାଜ୍ୟରେ ଆଗକୁ ଆଗକୁ ମାଡ଼ି ଚାଲିଛି ବିଜେପି । କେବଳ ତେଲେଙ୍ଗାନାକୁ ଛାଡ଼ି ଦେଲେ ସବୁଠି କଂଗ୍ରେସ ନିରାଶ ହୋଇଛି । ଆସୁଥିବା ଟ୍ରେଣ୍ଡରେ ୪ଟି ରାଜ୍ୟର ନିର୍ବାଚନୀ ଫଳାଫଳରୁ ୩ଟି ରାଜ୍ୟରେ ବିଜେପି ଆଗୁଆ ରହିଛି । ମଧ୍ୟପ୍ରଦେଶ ଓ ରାଜସ୍ଥାନରେ ବିଜେପି ସରକାରକୁ ଫେରୁଥିବା ଦେଖିବାକୁ ମିଳୁଥିବାବେଳେ, ଛତିଶଗଡରେ କଂଗ୍ରେସକୁ ଟକ୍କର ଦେଇ ଆଗୁଆ ରହିଛି ବିଜେପି । ବର୍ତ୍ତମାନର ଟ୍ରେଣ୍ଡ ଅନୁସାରେ ମଧ୍ୟପ୍ରଦେଶର ୨୩୦ ଆସନରୁ ୧୪୦ ସିଟରେ ଆଗୁଆ ରହିଛି ବିଜେପି । ସେହିପରି ଛତିଶଗଡର ୯୦ ଆସନରୁ ୫୩ ଆସନ ଏବଂ ରାଜସ୍ଥାନର ୧୯୯ ଆସନରୁ ୧୧୩ ସିଟରେ ଆଗୁଆ ରହିଛି ଭାରତୀୟ ଜନତା ପାର୍ଟି ।
ତେବେ ୪ଟି ରାଜ୍ୟରୁ ୩ଟି ରାଜ୍ୟରେ ବିଜେପିକୁ ସଫଳତା ମିଳିବା ପରେ ଦଳୀୟ ଶିବିରରେ ଉତ୍ସାହ ଦେଖିବାକୁ ମିଳିଛି । ଏହି ୩ଟି ରାଜ୍ୟରେ ମୋଦି ମ୍ୟାଜିକ୍ କାମ କରିଥିବା କୁହାଯାଉଛି । ଏଥର ମଧ୍ୟପ୍ରଦେଶରେ ପୁଣିଥରେ ବିଜେପି କ୍ଷମତା ଅକ୍ତିଆର କରୁଥିବା ଦେଖିବାକୁ ମିଳୁଛି । ବିରୋଧୀଙ୍କୁ ଚକମା ଦେଇ ଶିବରାଜ ସିଂ ଚୌହାନ ଏଠି ପୁଣିଥରେ ମୁଖ୍ୟମନ୍ତ୍ରୀ ହେବା ଏକପ୍ରକାର ପକ୍କା ହେବା ଅନୁମାନ କରାଯାଉଛି । ଅନ୍ୟପଟେ ରାଜସ୍ଥାନରେ ପରମ୍ପରା ବଜାୟ ରହିଥିବାବେଳେ, କଂଗ୍ରେସକୁ ହଟେଇ ପୁଣିଥରେ କ୍ଷମତାକୁ ଫେରୁଛି ବିଜେପି ।
ସେହିପରି ଛତିଶଗଡରେ ବଘେଲ ସରକାରକୁ ଚକମା ଦେଇ ବିଜେପି ଏଠାରେ ମଧ୍ୟ ଆଗୁଆ ରହିଛି । ତେବେ ଛତିଶଗଡ, ମଧ୍ୟପ୍ରଦେଶ, ରାଜସ୍ଥାନକୁ ଛାଡିଦେଲେ, କେବଳ ତେଲେଙ୍ଗାନାରେ ବର୍ତମାନ କଂଗ୍ରେସ ଆଗୁଆ ରହିଛି । ତେଲେଙ୍ଗାନାରେ ବିଆରଏସକୁ ପଛରେ ପକାଇ କଂଗ୍ରେସ କ୍ଷମତା ଅକ୍ତିଆର କରୁଥିବା ଦେଖିବାକୁ ମିଳୁଛି । ତେବେ ବିଜେପି ତେଲେଙ୍ଗାନାରେ ମଧ୍ୟ ଫାଇଦାରେ ରହିଛି । ଗତ ନିର୍ବାଚନରେ ତେଲେଙ୍ଗାନାରେ ବିଜେପି ମାତ୍ର ଗୋଟିଏ ସିଟ୍ ଜିତିବାକୁ ସକ୍ଷମ ହେଇଥିବାବେଳେ, ବର୍ତ୍ତମାନ ସୁଦ୍ଧା ୭ଟି ସିଟରେ ଆଗୁଆ ରହିଛନ୍ତି ବିଜେପି ପ୍ରାର୍ଥୀ । ଏକଜିଟ ପୋଲ ଦେଖି କଂଗ୍ରେସ ଉତ୍ସାହ ଥିଲା । କିନ୍ତୁ ଟ୍ରେଣ୍ଡ ଅନୁଯାୟୀ କଂଗ୍ରେସକୁ ନିରାଶ ହେବାକୁ ପଡ଼ିଛି ।
