ମଦ୍ୟପଙ୍କ ଦାଦାଗିରି
ସୋର, (ବଡ଼ ଖବର ବ୍ୟୁରୋ): ବାଲେଶ୍ୱର ଜିଲ୍ଲା ସିମୁଳିଆ ଥାନା ଜାମୁଝଡ଼ି ଅଞ୍ଚଳରେ ଦେଖିବାକୁ ମିଳିଛି ଅଭାବନୀୟ ଘଟଣା । ମଦ୍ୟପାନ କରି ୨ଜଣ ଚାଷୀଙ୍କୁ ମାଡ଼ମାରି ଲହୁଲୁହାଣ କରିଛନ୍ତି ୪ ମଦ୍ୟପ । ଆହତ ଦୁହେଁ ହେଲେ ଗଜେନ୍ଦ୍ର ବେହେରା ଓ ପ୍ରହଲ୍ଲାଦ ପାତ୍ର । ସିମୁଳିଆ ପୋଲିସ ଆହତଙ୍କୁ ଉଦ୍ଧାର କରି ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି । ମଦ୍ୟପ ଯୁବକଙ୍କୁ ଅଟକ ରଖି ପୋଲିସ ପଚରାଉଚରା କରୁଛି । ମଦ୍ୟପଙ୍କ ମଧ୍ୟରେ ଜଣେ ବ୍ୟାଙ୍କ କର୍ମଚାରୀ ଥିବା ପୋଲିସ ପ୍ରାଥମିକ ତଦନ୍ତରୁ ଜାଣିପାରିଛି ।
ଜାମୁଝଡ଼ି ମଦ କାଉଣ୍ଟର ପରିସରରେ ୪ଜଣ ଯୁବକ ବସି ମଦ ପିଉଥିଲେ । ବିଲକୁ ଯାଉଥିବା ଗଜେନ୍ଦ୍ରଙ୍କ ସହ ମଦ୍ୟପ ଯୁବକଙ୍କ କୌଣସି କାରଣରୁ ଯୁକ୍ତିତର୍କ ହୋଇଥିଲା । ନିଶାରେ ଥିବା ଯୁବକମାନେ ଗଜେନ୍ଦ୍ରଙ୍କୁ ନିର୍ଦ୍ଧୁମ ଛେଚିଥିଲେ । ଗଜେନ୍ଦ୍ରଙ୍କୁ ବଞ୍ଚାଇବାକୁ ଆସିଥିବା ପ୍ରହଲ୍ଲାଦଙ୍କୁ ମଧ୍ୟ ନିଶାସକ୍ତ ଯୁବମାନେ ଆକ୍ରମଣ କରିଥିଲେ । ବାଡ଼ି ଓ ପଥରରେ ଉଭୟଙ୍କୁ ଆକ୍ରମଣ କରି ଲହୁ ଲୁହାଣ କରି ପକାଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ମଦ୍ୟପ ଯୁବକଙ୍କୁ ଥାନାକୁ ନେଇଥିଲା । ତେବେ ମଦ କାଉଣ୍ଟର ପରିସରରେ ପିଇବା ଲାଗି ଅନୁମତି ନଥିବାବେଳେ ସେଠାରେ କିଭଳି ପିଉଥିଲେ ତାକୁ ନେଇ ଉଠିଛି ପ୍ରଶ୍ନ ।
