ପୋଲସରା ବିଜେଡିର ଦୁଇ ଗୋଷ୍ଠୀ ମଧ୍ୟରେ ବିବାଦ, ବନ୍ଦ ହେଲା ବନ୍ଧୁ ମିଳନ କାର୍ଯ୍ୟକ୍ରମ

ଆସିକା (ବଡ଼ ଖବର ବ୍ୟୁରୋ): ପୋଲସରା ନିର୍ବାଚନ ମଣ୍ଡଳୀ ବିଜେଡିର ଦୁଇ ଗୋଷ୍ଠୀ ମଧ୍ୟରେ କନ୍ଦଳ । ବୁଗଡା ବ୍ଲକର ବିଧାୟକ ଆଶାୟୀ ପ୍ରାର୍ଥୀଙ୍କ ବନ୍ଧୁ ମିଳନ କାର୍ଯ୍ୟକ୍ରମରେ ପୋଲସରା ବିଧାୟକଙ୍କ ସମର୍ଥକମାନେ ପ୍ରବେଶ କରି ହୋ ହାଲ୍ଲା କରିଥିଲେ । ଯହାଦ୍ୱାରା ବନ୍ଧୁ ମିଳନ କାର୍ଯ୍ୟ ଆରମ୍ଭ ନହେଉଣୁ ଭଣ୍ଡୁର ହୋଇ ଥିଲା । ଏହି କାର୍ଯ୍ୟକ୍ରମ ପୋଲସରା ମାତୃଶକ୍ତି କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଥିବା ବେଳେ ବିଜେଡିର ଅନ୍ୟତମ ଆଶାୟୀ ପ୍ରାର୍ଥୀ ଅବସପ୍ରାପ୍ତ ପ୍ରଧାନ ଶିକ୍ଷକ ଗୋପାଳ ଚନ୍ଦ୍ର ନାୟକ ବନ୍ଧୁ ମିଳନ କାର୍ଯ୍ୟକ୍ରମ ଆୟୋଜିତ କରିଥିଲେ ।

ଏତିକି ବେଳେ ବୈଠକ ଆରମ୍ଭରୁ ପୋଲସରା ବିଧାୟକ ଶ୍ରୀକାନ୍ତ ସାହୁଙ୍କ ସମର୍ଥକମାନେ ପଶି ହୋ ହାଲ୍ଲା କରିଥିଲେ । ଗୋଟିଏ ପଟେ ଆଶାୟୀ ଗୋପାଳ ଚନ୍ଦ୍ର ନାୟକ ନବୀନ ପଟ୍ଟନାୟକ ଜିନ୍ଦାବାଦ କହୁଥିବା ବେଳେ ବିଧାୟକ ଶ୍ରୀକାନ୍ତ ସାହୁଙ୍କ ସମର୍ଥକମାନେ ଶ୍ରୀକାନ୍ତ ସାହୁ ଜିନ୍ଦାବାଦ ନାରା ଦେଇଥିବା ଦେଖିବାକୁ ମିଳିଥିଲା । ଯାହା ଫଳର ଏକ ଅପ୍ରୀତିକର ପରିସ୍ଥିତି ସୃଷ୍ଟି ଯୋଗୁଁ ବୁଦ୍ଧିଜୀବୀ ମହଲରେ ନିନ୍ଦା କରାଯାଇଥିବା ଦେଖିବାକୁ ମିଳିଥିଲା । ସେପଟେ ଗଣତାନ୍ତ୍ରିକ ରାଷ୍ଟ୍ରରେ ବିଧାୟକଙ୍କ ସମର୍ଥକଙ୍କ ଏଭଳି କାର୍ଯ୍ୟକୁ ଗୋପାଳ ଚନ୍ଦ୍ର ନାୟକଙ୍କ ସମର୍ଥକମାନେ କ୍ଷୋଭ ପ୍ରକାଶ କରିଥିଲେ ।