ଭୋଟରଙ୍କୁ ପ୍ରତିଶ୍ରୁତି ଦେଇ ପାରୁନାହାନ୍ତି ବିଜେଡି ବିଧାୟିକା ପ୍ରାର୍ଥୀ

ପାରାଦୀପ (ବଡ଼ ଖବର ବ୍ୟୁରୋ): ଭୋଟରଙ୍କୁ ପ୍ରତିଶ୍ରୁତି ଦେଇ ପାରୁନାହାନ୍ତି ବିଜେଡି ବିଧାୟିକା ପ୍ରାର୍ଥୀ। କିନ୍ତୁ ଦଳରେ ନଥିବା ଜଣେ ନେତା ଜନତାଙ୍କ ସମସ୍ତ ଦୁଃଖ ଦୂର କରିବାକୁ ଦେଉଛନ୍ତି ପ୍ରତିଶ୍ରୁତି। ଯାହା ପାରାଦୀପବାସୀଙ୍କ ପ୍ରତି ବିଡମ୍ବନାର ବିଷୟ ବୋଲି ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛି ବିଜେପି। ପାରାଦୀପରେ ଶିକ୍ଷା, ସ୍ବାସ୍ଥ୍ୟ, ନିଯୁକ୍ତି, ଗମନାଗମନ ଓ ପିଇବା ପାଣିର ସମସ୍ୟା ଦୂର କରିବାରେ ବିଜେଡି ସରକାର ଏବଂ ପୂର୍ବତନ ବିଧାୟକ ସ୍ବର୍ଗତ ଦାମୋଦର ରାଉତ ଓ ତାଙ୍କ ପୁତ୍ର ସମ୍ବିତ ରାଉତରାୟ ସମ୍ପୂର୍ଣ୍ଣ ବିଫଳ ହୋଇଛନ୍ତି।

ମାତ୍ର ବିଜେଡିର ବିଧାୟିକା ପ୍ରାର୍ଥୀ ମୋର ଶଶୁର ବହୁତ କାମ କରିଛନ୍ତି ବୋଲି ପ୍ରଚାର କରିବା ସହିତ ଭୋଟ ଭିକ୍ଷା କରୁଛନ୍ତି। କୌଣସି ସମସ୍ୟାର ସମାଧାନ କରିବାକୁ ଭୋଟରଙ୍କୁ ପ୍ରତିଶ୍ରୁତି ଦେଇ ପାରୁନାହାନ୍ତି। କିନ୍ତୁ ବିଜେଡି ଦଳରେ ନଥିବା ଜଣେ ନେତା ବିଭିନ୍ନ ସଭାରେ ଆପଣ ବିଜେଡିକୁ ଭୋଟ ଦିଅନ୍ତୁ ମୁଁ ଆପଣଙ୍କ ସମସ୍ତ ସମସ୍ୟାର ସମାଧାନ କରିବି ଏବଂ ଏ ଦାୟିତ୍ୱ ମୋର ବୋଲି ପ୍ରତିଶୃତି ଦେଇ ଲୋକଙ୍କୁ ଭୁଆଁ ବୁଲାଇ ଭ୍ରମିତ କରୁଥିବା ବିଜେପି ଅଭିଯୋଗ କରିଛି।

ବହୁ ବିଜେଡି ସମର୍ଥୀତ ସରପଞ୍ଚ ଓ ସମିତି ସଭ୍ୟ ବିଜେଡି ଛାଡି ବିଜେପିରେ ସାମିଲ ହୋଇଛନ୍ତି। ତେଣୁ ବିଜେପି ଚଳିତ ନିର୍ବାଚନରେ ବହୁତ ଭଲ କରିବ ଏବଂ ବିଜୟୀ ହେବ ବୋଲି ସାମ୍ବାଦିକ ସମ୍ମିଳନୀରେ କୁହାଯାଇଛି। ସାମ୍ବାଦିକ ସମ୍ମିଳନୀରେ ବିଜେପି ଦଳର ବହୁ ବରିଷ୍ଠ ନେତା ଯୋଗ ଦେବା ସହିତ ମଙ୍ଗରାଜପୁର ପଞ୍ଚାୟତ ର ୧୯ ନମ୍ବର ୱାର୍ଡରେ ଏବେ ବି ଲୋକେ ପୋଖରୀ ପାଣିକୁ ଗରମ କରି ପିଇବା ପାଣି ଭାବେ ବ୍ୟବହାର କରୁଥିବା ଅଭିଯୋଗ କରିଛି ବିଜେପି।