ସ୍କୁଲ ସାମ୍ନାରୁ ପାଣି ସଫା ନହେବାରୁ ସ୍କୁଲରେ ତାଲା ପକାଇଲେ ଗ୍ରାମବାସୀ

କାମାକ୍ଷାନଗର (ବଡ଼ ଖବର ବ୍ୟୁରୋ): ଅଗଷ୍ଟ ୧୫ ତାରିଖ ରେ ସ୍କୁଲ ରାସ୍ତାରେ ୪ ଫୁଟର ପାଣି ବୋହିବା ଯୋଗୁ ଅଳିଆ ବୋହା ଟ୍ରଲିରେ ବୁହାହୋଇ ସ୍କୁଲ ଯାଇ ସ୍ୱାଧୀନତା ଦିବସ ପାଳିଥିଲେ ଶତାଧିକ ଛାତ୍ରଛାତ୍ରୀ । ଏ ସମ୍ପର୍କରେ ଖବର ପ୍ରସାରଣ ହେବାର ୧୨ ଦିନ ବିତି ଯାଇଥିଲେ ମଧ୍ୟ ସ୍କୁଲରୁ ପାଣି ନିଷ୍କାସନର ହୋଇପାରିଲାନି । ଫଳରେ ସ୍କୁଲ ଆଗରେ ତାଲା ପକାଇବା ସହ ପିଲାମାନଙ୍କୁ ସ୍କୁଲ ଛାଡିଲେ ନାହିଁ ଗ୍ରାମବାସୀ ।

ଏ ଭଳି ଘଟଣା ଦେଖିବାକୁ ମିଳିଛି କାମାକ୍ଷାନଗର ଏନଏସି ଅନ୍ତର୍ଗତ ଆଳତୁମା ଗାଁ ର ଦଧିବାମନ ଉପ୍ରା ବିଦ୍ୟାଳୟରେ । ଆଳତୁମା ଗ୍ରାମରେ ଥିବା ଦଧିବାମନ ଉପ୍ରା ବିଦ୍ୟାଳୟରେ ପ୍ରଥମ ଶ୍ରେଣୀରୁ ଆରମ୍ଭ କରି ସପ୍ତମ ଶ୍ରେଣୀ ପର୍ଯ୍ୟନ୍ତ ଶତାଧିକ ପିଲା ପାଠ ପଢୁଛନ୍ତି । କିନ୍ତୁ ବର୍ଷା ଦିନେ ସ୍କୁଲ ସାମ୍ନାରେ ଓ ସ୍କୁଲ ଭିତରେ ଚାରି ଫୁଟର ପାଣି ଜମି ରହୁଥିବା ଯୋଗୁ ପିଲା ଓ ଶିକ୍ଷକଶିକ୍ଷୟତ୍ରୀ ସ୍କୁଲ ଯିବାକୁ ଅସୁବିଧା ଭୋଗୁଛନ୍ତି ।

ଗତ ଅଗଷ୍ଟ ୧୫ ତାରିଖ ଦିନ ଏ ସମ୍ପର୍କରେ ଖବର ପ୍ରସାରଣ ପରେ ଦୀର୍ଘ ୧୨ ଦିନ ବିତି ଯାଇଥିଲେ ମଧ୍ୟ ପ୍ରଶାସନ ତରଫରୁ କୌଣସି ବ୍ୟବସ୍ଥା କରାନଯିବା ଫଳରେ ଗ୍ରାମବାସୀମାନେ ବିଦ୍ୟାଳୟରେ ତାଲା ପକାଇ ପିଲାମାନଙ୍କୁ ସ୍କୁଲ ଯିବା ପାଇଁ ବନ୍ଦ କରିବା ସହ ଜଳ ନିଷ୍କାସନ ପାଇଁ ସ୍ଥାୟୀ ପ୍ରତିକାର କରାନଗଲେ ରାଜରାସ୍ତାକୁ ଅବରୋଧ କରିବା ନେଇ ଗ୍ରାମବାସୀ ଚେତାବନୀ ଦେଇଛନ୍ତି ।