ଭାରତ ସହ ଟି-୨୦ ବିଶ୍ବକପ୍ ଖେଳିବ ପାକିସ୍ତାନ

ଭୁବନେଶ୍ୱର (ବଡ଼ ଖବର ବ୍ୟୁରୋ): ଭାରତ ସହ ଟି-୨୦ ବିଶ୍ବକପ୍ ଖେଳିବ ପାକିସ୍ତାନ। ଆଇସିସିର କଡ଼ା ଆଭିମୁଖ୍ୟ ଆଗରେ ପାକିସ୍ତାନ ୟୁ-ଟର୍ଣ୍ଣ ନେଇଥିବା ସୂଚନା ମିଳିଛି। ଭାରତ ବିପକ୍ଷରେ ଖେଳିବା ପାଇଁ ରାଜି ହୋଇଛି ପାକିସ୍ତାନ। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ଆସନ୍ତା ୧୫ ଫେବ୍ରୁଆରିରେ ଶ୍ରୀଲଙ୍କାର କଲମ୍ବୋଠାରେ ହାଇଭୋଲଟେଜ୍ ମ୍ୟାଚ୍ ଖେଳାଯିବ । ଲାହୋରରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ପାକିସ୍ତାନ କ୍ରିକେଟ୍ ବୋର୍ଡ ଏହି ନିଷ୍ପତ୍ତି ନେଇଥିବା ସୂଚନା ମିଳିଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଆଇସିସି ସହିତ ପିସିବିର ଆଲୋଚନା ବେଳେ ପାକିସ୍ତାନ ଭାରତ ସହିତ ଖେଳିବାକୁ ରାଜି ଥିବା ଜଣାଇଛି ।

ତେବେ ଆଇସିସି ଏବଂ ପିସିବିର ଔପଚାରିକ ଘୋଷଣାକୁ ଅପେକ୍ଷା ରହିଛି । ଜାତୀୟ ଗଣମାଧ୍ୟମରେ ପ୍ରକାଶିତ ତଥ୍ୟ ଅନୁସାରେ, ଭାରତ ସହ ଖେଳିବାକୁ ପାକିସ୍ତାନ ୩ଟି ସର୍ତ୍ତ ରଖିଥିଲା । କିନ୍ତୁ ଇଣ୍ଟରନ୍ୟାସନାଲ କ୍ରିକେଟ୍ କାଉନସିଲ୍ ବା ଆଇସିସି ସମସ୍ତ ସତ୍ତର୍କୁ ପ୍ରତ୍ୟାଖ୍ୟାନ କରିଛି । ପିସିବିକୁ ଚରମ ଚେତାବନୀ ଦେଇଛି ଆଇସିସି । ଯଦି ପାକିସ୍ତାନ ଧାର୍ଯ୍ୟ ସମୟରେ ନିଷ୍ପତ୍ତି ନନିଏ, ତେବେ ସେମାନଙ୍କୁ ଟୁର୍ଣ୍ଣାମେଣ୍ଟରୁ ବାଦ୍ ଦିଆଯାଇପାରେ । ସେପଟେ ସୁରକ୍ଷା କାରଣ ଦର୍ଶାଇ ଭାରତ ଆସିବାକୁ ମନା କରୁଥିବା ବାଂଲାଦେଶର ଦାବିକୁ ମଧ୍ୟ ଆଇସିସି ଅଗ୍ରାହ୍ୟ କରିଛି । ତେଣୁ ୧୫ ତାରିଖରେ ଭାରତ-ପାକିସ୍ତାନ ହାଇଭୋଲଟେଜ୍ ଟି-୨୦ ମ୍ୟାଚ ହେବା ଏକପ୍ରକାର ନିଶ୍ଚିତ । ବିଧିବଦ୍ଧ ଘୋଷଣା ବାକି ।