ପହଲଗାମ୍ ଆତଙ୍କୀ ହମଲାକୁ ବର୍ଷେ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ୨୦୨୫ ଏପ୍ରିଲ ୨୨ରେ ଜମ୍ମୁ କାଶ୍ମୀର ପହଲଗାମରେ ଜଘନ୍ୟ, ବର୍ବର ଏବଂ ଘୃଣ୍ୟ ନରସଂହାର ଘଟିଥିଲା । ବୈସରନ ଘାଟିରେ ମାନବିକତା ଉପରେ ଯେଉଁ ଆକ୍ରମଣ ହୋଇଥିଲା ତାହା ସାରା ବିଶ୍ୱକୁ ସ୍ତବ୍ଧ କରିଥିଲା । କେହି କେବେ ଭାବି ନଥିଲେ କିଛି କ୍ଷଣ ଭିତରେ ସେମାନଙ୍କ ଆନନ୍ଦ ଆତଙ୍କରେ ପରିଣତ ହୋଇଯିବ । କେହି କିଛି ବୁଝିବା ଆଗକୁ ଆତଙ୍କବାଦୀମାନେ ପର୍ଯ୍ୟଟକଙ୍କୁ ବନ୍ଧୁକ ମୁନକୁ ନେଇ ଯାଇଥିଲେ । ଜମ୍ମୁକାଶ୍ମୀରର ପହଲଗାମ୍ରେ ଗତବର୍ଷ ହୋଇଥିବା ଆତଙ୍କବାଦୀ ଆକ୍ରମଣକୁ ଆଜି ବର୍ଷେ ପୂରିଛି ।
ଘଟଣାକୁ ବର୍ଷେ ପୂରିଥିବା ବେଳେ ଭାରତୀୟ ସେନା ଏକ କଡ଼ା ଚେତାବନୀ ଜାରି କରିଛି । ଭାରତୀୟ ସେନା ପାକିସ୍ତାନକୁ ଏକ କଡ଼ା ବାର୍ତ୍ତା ଦେଇଛି। ସେନା କହିଛି, କିଛି ସୀମା ଅଛି ଯାହାକୁ କେବେବି ଲଙ୍ଘନ କରାଯିବା ଉଚିତ୍ ନୁହେଁ ଏବଂ ଯଦି ଏପରି କରାଯାଏ ତେବେ ପରିଣାମ ବିଷୟରେ ସ୍ମରଣ କରିବାକୁ ହେବ । ପହଲଗାମ ଆକ୍ରମଣର ବାର୍ଷିକୀରେ, ଭାରତୀୟ ସେନା ସୋସିଆଲ ମିଡିଆ ଏକ୍ସରେ କହିଛି, ଯେତେବେଳେ ମାନବତାର ସୀମା ଲଙ୍ଘନ କରାଯାଏ, ସେତେବେଳେ ପ୍ରତିକ୍ରିୟା ନିର୍ଣ୍ଣାୟକ ହୋଇଥାଏ। ନ୍ୟାୟ ପ୍ରଦାନ କରାଯାଏ ।
ଭାରତ ଏକଜୁଟ ହୋଇ ଠିଆ ହୁଏ । ଏହି ପୋଷ୍ଟରେ ସେନା ଏକ ଫଟୋ ଜାରି କରିଛି, ଯେଉଁଥିରେ ସିନ୍ଦୂର ଏବଂ ଭାରତର ନକ୍ସା ଦେଖାଯାଇଛି । ଏହାର ଥିମ୍ ‘ଅପରେସନ ସିନ୍ଦୂର’ ସହ ଯୋଡ଼ି ହୋଇଛି । ପହଲଗାମ୍ ହମଲାର ପ୍ରତିଶୋଧ ନେବା ପାଇଁ ଭାରତୀୟ ବାୟୁସେନା ମେ ୭ ରାତି ପ୍ରାୟ ୧.୦୫ରେ ପାକିସ୍ତାନ ଏବଂ ପିଓକେରେ ସାଙ୍ଘାତିକ ଏୟାରଷ୍ଟ୍ରାଇକ୍ କରିଥିଲା । ୨୫ ମିନିଟର ଅପରେସନରେ ୭ ସହରରେ ଥିବା ୯ ଆତଙ୍କୀ ଶିବିରକୁ ଧ୍ୱଂସ କରାଯାଇଥିଲା । ଏହାକୁ ‘ଅପରେସନ ସିନ୍ଦୂର’ ନାମ ଦିଆଯାଇଥିଲା । ଏଥିସହ ଅପରେସନ୍ ‘ମହାଦେବ’ରେ ୩ ଆତଙ୍କବାଦୀଙ୍କୁ ଖୋଜି ଖୋଜି ଜୁଲାଇ ୨୮ ତାରିଖରେ ନିପାତ କରିଥିଲା ଭାରତୀୟ ସେନା ।