ମହାପ୍ରଭୁଙ୍କ ପାଇଁ ପ୍ରାଚୀକ୍ଷେତ୍ରରୁ ଶ୍ରୀକ୍ଷେତ୍ରକୁ ଯାଉଛି ଫଳଭାର

ଭୁବନେଶ୍ୱର (ବଡ଼ ଖବର ବ୍ୟୁରୋ): ପ୍ରାଚୀକ୍ଷେତ୍ରରୁ ଶ୍ରୀକ୍ଷେତ୍ରକୁ ଯାଉଛି ଫଳଭାର । ଜ୍ୱରରେ ପୀଡିତ ମହାପ୍ରଭୁଙ୍କ ପାଇଁ କାକଟପୁରରୁ ଯାଉଛି ବିଭିନ୍ନ ପ୍ରକାର ଫଳ । ସ୍ନାନ ପୂର୍ଣ୍ଣିମାରେ ମହାସ୍ନାନ ପରେ ଜ୍ୱରରେ ପୀଡିତ ଶ୍ରୀଜିଉଙ୍କୁ ସୁସ୍ଥ କରିବା ପାଇଁ ଲାଗିଛନ୍ତି ଦଇତାପତି ସେବାୟତ । ବିଶ୍ୱନିୟନ୍ତା ଅଣସର ଘରେ ଥିବା ବେଳେ ବିଭିନ୍ନ ସେବା, ନୀତିକାନ୍ତି କରାଯାଉଛି । ଏହି ଅବସରରେ କାକଟପୁର ପ୍ରାଚୀକ୍ଷେତ୍ରରୁ ବନୌସଦ୍ଧି, ବନ ସୁସ୍ୱାଦୁ ଫଳଭାର ଶଗଡ଼ ଗାଡ଼ିରେ ଶ୍ରୀକ୍ଷେତ୍ରକୁ ପଠାଯାଉଛି ।

ଆଜି ପୁରୀରେ ପହଞ୍ଚିବ ଏହି ଫଳ ଭାର । କାକଟପୁର ପ୍ରାଚୀ ତଟରେ ଥିବା ମଠ, ମନ୍ଦିର ଏବଂ ଗ୍ରାମାବାସୀଙ୍କ ଠାରୁ ସଂଗୃହିତ ଆମ୍ବ, ପଣସ, ଖଜୁରୀ, ନଡିଆ, ସପୁରୀ, ସେଓ ଭଳି ପ୍ରାୟ ୧୫ ପ୍ରକାର ଫଳ ପୁରୀକୁ ପଠାଯାଉଛି । ପ୍ରାଚୀ କୂଳରେ ଥିବା ଦେଉଳି ମଠରୁ ଅଣସର ଭାର ପୁରୀ ଅଭିମୁଖେ ବାହାରିଛି । ଏହି ଭାରକୁ ପୁରୀର ହାତି ଆଖଡା ମଠରେ ଶ୍ରୀମନ୍ଦିର ପ୍ରଶାସନ ଗ୍ରହଣ କରିବା ପରେ ଶ୍ରୀଜିଉଙ୍କୁ ଲାଗି କରାଯିବାର ପରମ୍ପରା ରହିଛି ।