ଗିରଫ ଆଶିଷ ମିଶ୍ରା ଡାକ୍ତରଖାନାରେ ଭର୍ତ୍ତି ହେବେ !
(ବଡ଼ ଖବର ବ୍ୟୁରୋ) ଉତ୍ତର ପ୍ରଦେଶର ଲଖିମପୁରରେ ଘଟିଥିବା ଖେରି ହିଂସା ଘଟଣାରେ ଗିରଫ ହୋଇଥିବା କେନ୍ଦ୍ର ଗୃହ ରାଷ୍ଟ୍ର ମନ୍ତ୍ରୀଙ୍କ ପୁଅ ଆଶିଷ ମିଶ୍ରାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇପାରେ । ଆଶିଷଙ୍କ ଠାରେ ଡେଙ୍ଗୁର ଲକ୍ଷଣ ଦେଖାଯାଇଥିବାରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯିବ । ଏ ନେଇ ପୋଲିସ ପକ୍ଷରୁ ଖବର ମିଳିଛି ।
ଲଖିମପୁର ଖେରି ଜେଲ କର୍ତ୍ତୁପକ୍ଷ କହିଛନ୍ତି ଆଶିଷ ଡେଙ୍ଗୁରେ ଆକ୍ରାନ୍ତ ଅଛନ୍ତି କି ନା ତାହା ଏ ଯାଏ ସ୍ପଷ୍ଟ ହୋଇନି । ପ୍ରଥମେ ତାଙ୍କୁ ଡାକ୍ତରାଖାନାକୁ ନିଆଯାଇ ଟେଷ୍ଟ କରାଯିବ । ଟେଷ୍ଟ ରିପୋର୍ଟ ଆସିବା ପରେ ତାଙ୍କର କଣ ହୋଇଛି , ଜଣାପଡିବ । ସୂଚନା ଅକ୍ଟୋବର ୩ ତାରିଖରେ ଲଖିମପୁର ଖେରିରେ ଚାଷୀମାନେ ବିକ୍ଷୋଭ ପ୍ରଦର୍ଶନ କରୁଥିବା ବେଳେ ଆଶିଷ ମିଶ୍ରାଙ୍କ କାର ସେମାନଙ୍କ ଉପରେ ଚଢିଯାଇଥିବା ।
ଫଳରେ ଚାରି ଜଣ ଚାଷୀଙ୍କ ମୃତ୍ୟୁ ହୋଇଥିଲା । ଏହା ପରେ ଏହି ହିଂସା କାଣ୍ଡରେ ଆଉ ୪ ଜଣଙ୍କ ର ମୃତ୍ୟୁ ହୋଇଥିଲା । ଏହା ପରେ ତାଙ୍କୁ ଅକ୍ଟୋବର ୯ ତାରିଖରେ ତାଙ୍କୁ ଗିରଫ କରାଯାଇଥିଲା । ପ୍ରାୟ ୧୨ ଘଣ୍ଟାର ଜେରା ପରେ ତାଙ୍କୁ ସେହି ଦିନ ରାତିରେ ଗିରଫ କରାଯାଇଥିଲା । ଏହି ଘଟଣାରେ ଆଶିଷ ମିଶ୍ରାଙ୍କୁ ମିଶାଇ ୧୩ ଜଣ ଗିରଫ ହୋଇସାରିଲେଣି ।