ତିର୍ତ୍ତୋଲରେ ପଶିଲା ବନ୍ୟା ଜଳ, ବଢ଼ିଲା ଲୋକଙ୍କ ଚିନ୍ତା
ତିର୍ତ୍ତୋଲ(ବଡ଼ ଖବର ବ୍ୟୁରୋ): ଜଗତସିଂହପୁରରେ ପ୍ରବେଶ କଲା ବନ୍ୟା ଜଳ । ତିର୍ତ୍ତୋଲ ବ୍ଲକ ଲକଛକ ମୁଣ୍ଡାସାହି ନିକଟରେ ପ୍ରବେଶ କଲା ଚଳିତ ବର୍ଷର ପ୍ରଥମ ବନ୍ୟାଜଳ। ପ୍ରାୟ ୨୦ ରୁ ଉର୍ଦ୍ଧ୍ବ ପରିବାର ଜଳବନ୍ଦୀ ହୋଇଥିବା ସୂଚନା ମିଳିଛି। ଖବର ପାଇ ଘଟଣା ସ୍ଥଳରେ ପହଞ୍ଚି ସ୍ଥିତ ସମୀକ୍ଷା କରିଛନ୍ତି ତିର୍ତ୍ତୋଲ ତହସିଲଦାର ଓ ଆର ଆଇ । ପାଣି ଘେରରେ ଥିବା ଲୋକମାନଙ୍କୁ ଭୟବିତ ନହେବାକୁ ପରାମର୍ଶ ଦେବା ସହିତ ପାଣି ବଢ଼ିଲେ ଉଚ୍ଚ ସ୍ଥାନକୁ ଯିବାକୁ ପରାମର୍ଶ ଦେଇଛନ୍ତି। ସରକାରଙ୍କ ପକ୍ଷରୁ ରିଲିଫ ସାମଗ୍ରୀ ଦିଆଯିବା ସହିତ ସମ୍ପୁର୍ଣ୍ଣ ସହଯୋଗ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଏ ସମ୍ପର୍କରେ ବିଡ଼ିଓ ଗିରିଜା ଶଙ୍କର ମଲ୍ଲିକ ସଜାଗ ରହିବା ସହିତ ସମସ୍ତ ଅଧିକାରୀ ସହ ସ୍ଥାନୀୟ ସରପଞ୍ଚଙ୍କୁ ସଜାଗ ରହିବାକୁ ନିଦେ୍ର୍ଦଶ ଦେଇଛନ୍ତି।
ପାଣି ବଢ଼ିଲେ ଲୋକମାନଙ୍କୁ ନିକଟସ୍ଥ ସ୍କୁଲକୁ ସ୍ଥାନାନ୍ତରିତ କରାଯିବା ସହିତ ସେମାନଙ୍କୁ ଶୁଖିଲା ଖାଦ୍ୟ ଯୋଗାଇ ଦିଆଯିବ ବୋଲି ତହସିଲଦାର ମହେଶ୍ବର ବେହେରା କହିଛନ୍ତି। ନିର୍ବାଚନ ଆସିଲେ ଅନେକ ନେତା ଆସନ୍ତି ଭୋଟ ପାଇଁ ଏହାର ସମାଧାନ ପାଇଁ ପ୍ରତିଶ୍ରୁତି ଦେଇ ଭୁଲି ଯାଇଥାନ୍ତି। ସବୁଠୁ ଦୁଃଖର କଥା ହେଉଛି ତାଙ୍କୁ ଥଇଥାନ କରିବା ପାଇଁ ପ୍ରଧାନମନ୍ତ୍ରୀ ଗ୍ରାମୀଣ ଯୋଜନାରେ ଯେଉଁ ଘର ଯୋଗାଇ ଦିଆଯାଇଛି ତାହା ମଧ୍ୟ ଖାଲରେ ନିର୍ମାଣ କରାଯାଇଛି। ବନ୍ୟାଜଳ ଏହି ବସ୍ତିରେ ପଶିବା କ୍ଷଣି ଯୋଗାଇ ଦିଆଯାଇଥିବା ବାସ ଗୃହ ରେ ମଧ୍ୟ ପାଣି ପଶିଥାଏ। ସେଥିପାଇଁ ଏ ପର୍ୟ୍ୟନ୍ତ ସେ ଘରେ କେହି ରହିବା ସମ୍ଭବ ହୋଇପାରି ନାହିଁ। ଯାହା ଫଳରେ ଏହି ମୁଣ୍ଡା ବସ୍ତିରେ ବସବାସ କରୁଥିବା ଲୋକମାନେ ନାଇଁ ନଥିବା ହଇରାଣ ହେଉଛନ୍ତି।ତେବେ ଏହାର ତୁରନ୍ତ ସ୍ଥାୟୀ ସମାଧାନ ପାଇଁ ସାଧାରଣରେ ଦାବି ହୋଇଛି।