ବଢ଼ୁଛି ବୈଜୟନ୍ତଙ୍କ ବିବାଦ
ଭୁବନେଶ୍ୱର (ବଡ଼ ଖବର ବ୍ୟୁରୋ): ବିଜେପି ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡାଙ୍କ ଟ୍ୱିଟକୁ ନେଇ ଦୁଇଦିନ ହେବ ଲାଗି ରହିଛି ବିବାଦ । ଶାସକ ଦଳର ନେତାମାନେ ବୈଜୟନ୍ତଙ୍କ ଟ୍ୱିଟର କଡ଼ା ଜବାବ ଦେଇଥିବା ବେଳେ ଏବେ ଜନସାଧାରଣଙ୍କ ମଧ୍ୟରେ ପ୍ରତିକ୍ରିୟା ଦେଖିବାକୁ ମିଳିଛି । ଏନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି । ଓଡ଼ିଶା ଷ୍ଟୁଡେଣ୍ଟ ଆଣ୍ଡ ୟୁଥ୍ ଫୋରମ ପକ୍ଷରୁ ବୈଜୟନ୍ତଙ୍କ ବିପକ୍ଷରେ ବିକ୍ଷୋଭ କରାଯାଇଛି । ସୋମବାର ମାଷ୍ଟର କ୍ୟାଷ୍ଟିନ ନିକଟରେ ବୈଜୟନ୍ତଙ୍କ କୁଶପୁତ୍ତଳିକା ଦାହ କରାଯାଇଛି । ବୈଜୟନ୍ତ ଓଡ଼ିଶାକୁ ଦେଶର ଚିରଶତ୍ରୃ ପାକିସ୍ତାନ ସହ ତୁଳନା କରିଥିବାରୁ ଫୋରମ ପକ୍ଷରୁ ଘୋର ନିନ୍ଦା କରାଯାଇଛି । ଜୟ ପଣ୍ଡା ଓଡ଼ିଶାବାସୀଙ୍କୁ କ୍ଷମା ମାଗନ୍ତୁ ବୋଲି ମଧ୍ୟ ଫୋରମ ପକ୍ଷରୁ ଦାବି କରାଯାଇଛି ।
ସେପଟେ ସମ୍ବଲପୁର ସହରରେ ମଧ୍ୟ ବୈଜୟନ୍ତ ପଣ୍ଡାଙ୍କ ବିବାଦୀୟ ଟ୍ୱିଟକୁ ନେଇ ଅସନ୍ତୋଷ ଦେଖାଦେଇଛି । ସ୍ୱାଭିମାନ ଓଡ଼ିଶା ସମ୍ବଲପୁର ଶାଖା ପକ୍ଷରୁ ବୈଜୟନ୍ତ ପଣ୍ଡାଙ୍କ କୁଶପୁତ୍ତଳିକା ଦାହ କରାଯାଇଛି ।
ଗୋଲବଜାର ଛକଠାରେ ସ୍ୱାଭିମାନ ଓଡ଼ିଶା ସମ୍ବଲପୁର ଶାଖାର ସଭ୍ୟମାନେ ବିକ୍ଷୋଭ କରିବା ସହ କୁଶପୁତ୍ତଳିକା ଦାହ କରିଛନ୍ତି । ବୈଜୟନ୍ତ କ୍ଷମା ନମାଗିବା ପର୍ଯ୍ୟନ୍ତ ଏଭଳି ବିକ୍ଷୋଭ ଚାଲୁ ରହିବ ବୋଲି ସଂଘ ପକ୍ଷରୁ କୁହାଯାଇଛି ।