ଲଢେଇରେ ଆଖି ବୁଜିଲା କୃଷ୍ଣସାର
ଭୁବନେଶ୍ୱର(ବଡ଼ ଖବର ବ୍ୟୁରୋ): ନନ୍ଦନକାନନ ପ୍ରାଣୀଉଦ୍ୟାନର ୬୫ ନମ୍ବର ଖୁଆଡରେ ରହୁଥିବା ବୟସ୍କ ଅଣ୍ଡିରା କୃଷ୍ଣସାର ମୃଗର ଆଜି ମୃତ୍ୟୁ ଘଟିଛି ।ଶନିବାର ଅପରାହ୍ନରେ ୨ଟି କୃଷ୍ଣସାର ମୃଗ ମଧ୍ୟରେ ଲଢେଇ ହୋଇଥିଲା । ୧୨ ବର୍ଷର ବୟସ୍କ କୃଷ୍ଣସାର ମୃଗର ମୁଣ୍ଡରେ ଗଭୀର ଆଘାତ ଲାଗି ଗୁରୁତର ହୋଇପଡିଥିଲା । ଜନ୍ତୁ ବିଭାଗ ଅଧିକାରୀଙ୍କ ଅବହେଲାରୁ ଛଟପଟ ହେଉଥିବା କୃଷ୍ଣସାର ମୃଗଟିର ବିଳମ୍ବରେ ଚିକିତ୍ସା କରାଯାଇଥିଲା । ଆଜି ସକାଳୁ ଖୁଆଡ ମଧ୍ୟରେ ମରି ପଡିଥିବା ଦେଖିବାକୁ ମିଳିଛି । କେଉଁ କାରଣ ଯୋଗୁଁ କୃଷ୍ଣସାର ମୃଗର ମୃତ୍ୟୁ ଘଟିଲା ତାହା ବ୍ୟବଚ୍ଛେଦ ରିପୋର୍ଟ ଆସିବା ପରେ ଜଣାପଡିବ । ବର୍ତ୍ତମାନ ନନ୍ଦନକାନନରେ ଏହି ମୃଗର ମୃତ୍ୟୁ ପରେ କୃଷ୍ଣସାର ମୃଗ ସଂଖ୍ୟା ୩୯କୁ ଖସିଯାଇଛି ।