ଚେନ୍ନାଇକୁ ମାତ୍ ଦେଲା ବିରାଟ ବାହିନୀ

ଦୁବାଇ, (ବଡ଼ ଖବର ବ୍ୟୁରୋ) : ଆଇପିଏଲର ତ୍ରୟୋଦଶ ସିଜନର ୨୫ ତମ ମ୍ୟାଚକୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ତାର ନାଁ ରେ କରିଛି | ଶନିବାର ରାତିରେ ଦୁବାଇରେ ଆରସିବି ଚେନ୍ନାଇ ସୁପର କିଙ୍ଗ୍ସ (ସିଏସକେ) କୁ ୩୭ ରନରେ ପରାସ୍ତ କରିଛି। ୧୭୦ ରନର ଲକ୍ଷ୍ୟକୁ ପଛରେ ପକାଇ ମହେନ୍ଦ୍ର ସିଂ ଧୋନିଙ୍କ ନେତୃତ୍ୱରେ ଚେନ୍ନାଇ ଦଳ ନିର୍ଦ୍ଧାରିତ ଓଭରରେ ମାତ୍ର ୧୩୨/୮ ରନ୍ କରିଥିଲା । ଏହି ବିଜୟ ସହିତ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଛଅଟି ମ୍ୟାଚ ଖେଳି ଚତୁର୍ଥ ବିଜୟ ହାସଲ କରିଛି | ବର୍ତ୍ତମାନ ସେ ୮ଅଙ୍କ ସହିତ ପଏଣ୍ଟ ଟେବୁଲରେ ଚତୁର୍ଥ ସ୍ଥାନରେ ଅଛନ୍ତି | ଅପରପକ୍ଷରେ ଚେନ୍ନାଇ ସୁପର କିଙ୍ଗସ ୭ଟି ମ୍ୟାଚରୁ ପାଞ୍ଚଟି ପରାଜୟ ସହ ସପ୍ତମ ସ୍ଥାନରେ ରହିଛି।

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ରୟାଲ ଚ୍ୟାଲେଞ୍ଜର୍ସକୁ ପ୍ରଥମରୁ ଝଟକା ଲାଗିଥିଲା। ଆରୋନ ଫିଞ୍ଚ ୨ ରନ କରି ଦୀପକ ଚହରଙ୍କ ବଲରେ କ୍ଲିନ ବୋଲ୍ଡ ହୋଇଥିଲେ। ଅନ୍ୟପଟେ ଅଧିନାୟକତ୍ଵ ଇନିଂସ ଖେଳିଥିବା କୋହଲି ଆଇପିଏଲରେ ୩୮ତମ ଅର୍ଦ୍ଧଶତକ ହାସଲ କରିଛନ୍ତି। ବିରାଟ କୋହଲି ୫୨ଟି ବଲରୁ ୪ ଚୌକା ଓ ୪ ଛକା ସହ ୯୦ ରନର ଅପରାଜିତ ଇନିଂସ ଖେଳିଥିଲେ। ଫଳରେ ବେଙ୍ଗାଲୁରୁ ନିର୍ଦ୍ଧାରିତ ଓଭରରେ ୪ ଓ୍ଵିକେଟ୍ ହରାଇ ୧୬୯ ରନ କରିଛି। ଚେନ୍ନାଇ ପକ୍ଷରୁ ଶାର୍ଦ୍ଦୁଳ ଠାକୁର ୨ଟି, ଦୀପକ ଚହର ଓ ସାମ କରନ ଗୋଟିଏ ଲେଖାଏଁ ଓ୍ଵିକେଟ୍ ନେଇଥିଲେ।
୧୭୦ ରନର ପିଛା କରୁଥିବା ଚେନ୍ନାଇ ଦଳ ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସାମ୍ନା ହୋଇଥିଲା। ଚେନ୍ନାଇର ପ୍ରାରମ୍ଭିକ ଯୋଡ଼ି ଶୀଘ୍ର ଆଉଟ ହୋଇଗଲେ ଓ ପରେ ଚେନ୍ନାଇ ପକ୍ଷରୁ ଆଉ କୌଣସି ବ୍ୟାଟ୍ସମ୍ୟାନ ଭଲ ପ୍ରଦର୍ଶନ କରିପାରିଲେ ନାହିଁ । ଫଳରେ ନିର୍ଦ୍ଧାରିତ ଓଭରରେ ଚେନ୍ନାଇ ୮ ଓ୍ଵିକେଟ୍ ହରାଇ ୧୩୨ ରନ କରିପାରିଥିଲେ । ଚେନ୍ନାଇ ପକ୍ଷରୁ ରାୟୁଡୁ ୪୨ ଓ ଜଗଦୀଶନ୍ ୩୩ ରନ କରିଥିଲେ । ବାଙ୍ଗାଲୋର ପକ୍ଷରୁ କ୍ରିଷ୍ ମୋରିସ୍ ୩ଟ , ସୁନ୍ଦର ୨ଟି , ଚହଲ ଓ ଉଡାନା ଗୋଟିଏ ଲେଖାଏଁ ଓ୍ଵିକେଟ୍ ନେଇଥିଲେ।