ନେଦରଲ୍ୟାଣ୍ଡରୁ ଭାରତ ପହଞ୍ଚିଲା କୋଭିଡ଼ ରିଲିଫ ସାମଗ୍ରୀ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ନେଦରଲ୍ୟାଣ୍ଡରୁ ଆସି ଭାରତରେ ପହଞ୍ଚିଲା ପ୍ରଥମ କୋଭିଡ଼ ରିଲିଫ ସାମଗ୍ରୀ । ପ୍ରଥମ ପର୍ଯ୍ୟାୟରେ ହିଁ ୪୪୯ଟି ଭେଣ୍ଟିଲେଟର, ୧୦୦ଟି ଅକ୍ସିଜେନ କନସେଣ୍ଟ୍ରେଟର ଓ କୋଭିଡ଼-୧୯ର ଆଉ କିଛି ରିଲିଫ ସାମଗ୍ରୀ ଆସି ଭାରତରେ ପହଞ୍ଚିଛି । ବିମାନ ଯୋଗେ ଏହି ସବୁ ସାମଗ୍ରୀ ଆସି ଭାରତରେ ପହଞ୍ଚିଛି । ଭାରତରେ ବଢ଼ିଚାଲିଥିବା ସଂକ୍ରମଣ ଓ ଦ୍ୱିତୀୟ ଲହର ମୁକାବିଲା ପାଇଁ ସହାୟତାର ହାତ ବଢ଼ାଇଛି ନେଦରଲ୍ୟାଣ୍ଡ ।

ଏନେଇ ବୈଦେଶିକ ବ୍ୟାପାର ମନ୍ତ୍ରାଳୟର ମୁଖପାତ୍ର ଅରିନ୍ଦମ ବାଗଚି ଟ୍ୱିଟ କରି ସୂଚନା ଦେଇଛନ୍ତି । ସେ ଲେଖିଛନ୍ତି ଯେ, ଆମର ବହୁମୁଖୀ ସହଯୋଗ ଆହୁରି ସୁଦୃଢ଼ ହୋଇଛି । ପ୍ରଥମ ପର୍ଯ୍ୟାୟରେ ୪୪୯ଟି ଭେଣ୍ଟିଲେଟର, ୧୦୦ଟି ଅକ୍ସିଜେନ କନସେଣ୍ଟ୍ରେଟର ଏବଂ ଅନ୍ୟାନ୍ୟ ଡାକ୍ତରୀ ଉପକରଣ ନେଦରଲ୍ୟାଣ୍ଡରୁ ଆସି ପହଞ୍ଚିଛି । ଆଗାମୀ ଦିନ ମାନଙ୍କରେ ଆହୁରି ବାକି ଉପକରଣ ମଧ୍ୟ ପହଞ୍ଚିବ । ନେଦରଲ୍ୟାଣ୍ଡର ଏହି ସହଯୋଗ ଆମ ପାଇଁ ଅତ୍ୟନ୍ତ ଗରୁତ୍ୱପୂର୍ଣ୍ଣ । ତେବେ ଇଂଲଣ୍ଡ, ଯୁକ୍ତରାଷ୍ଟ୍ର ଆମେରିକା, ଜର୍ମାନୀ ଓ ଋଷ ସମତେ ଅନ୍ୟ ରାଷ୍ଟ୍ର ମଧ୍ୟ ଭାରତକୁ ସହଯୋଗର ହାତ ବଢ଼ାଇଛନ୍ତି ।