କଂଗ୍ରେସର ପ୍ରତିବାଦ ଯାତ୍ରା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଆସନ୍ତାକାଲି ସମସ୍ତ କଂଗ୍ରେସ ସାଂସଦ ଏବଂ ନେତାମାନେ ପ୍ରତିବାଦ ଯାତ୍ରାରେ ରାଷ୍ଟ୍ରପତି ଭବନକୁ ଯିବା ପାଇଁ ନିଷ୍ପତି ନେଇଛନ୍ତି । କୃଷି ଆଇନ୍ ବିରୋଧରେ ୨ କୋଟି ଦସ୍ତଖତ ସମ୍ବଳିତ କିଛି ସ୍ମାରକପତ୍ର ରାଷ୍ଟ୍ରପତି ରାମନାଥ କୋବିନ୍ଦଙ୍କ ନିକଟରେ ଦାଖଲ କରିବେ ।

ପ୍ରବଳ ଶୀତରେ ପ୍ରାୟ ମାସେ ହେବ ଦିଲ୍ଲୀ ସୀମାନ୍ତରେ ପ୍ରତିବାଦ କରୁଥିବା କୃଷକମାନଙ୍କୁ ସମର୍ଥନ କରି ରାହୁଲ ଗାନ୍ଧିଙ୍କ ନେତୃତ୍ୱରେ କଂଗ୍ରେସ ସାଂସଦଙ୍କ ପ୍ରତିନିଧୀ ଦଳ ପାର୍ଲାମେଂଟର ବିଜୟ ଚୌକରୁ ବାହାରି ରାଷ୍ଟ୍ରପତି ଭବନକୁ ଯିବେ । ପାର୍ଲାମେଂଟରେ ଆଗତ ହେବା ସମୟରୁ ଏହି ଆଇନକୁ ବିରୋଧ କରୁଥିବା କୃଷକ, କୃଷି ଶ୍ରମିକ ଏବଂ କୃଷିରେ ସମ୍ପୃକ୍ତ ଅନ୍ୟ ବ୍ୟକ୍ତିବିଶେଷଙ୍କ ସ୍ୱାକ୍ଷର ସମ୍ବଳିତ ସ୍ମାରକପତ୍ର ସଂଗ୍ରହ କରିବାକୁ କଂଗ୍ରେସ ଦେଶବ୍ୟାପୀ ଅଭିଯାନ ଚଳାଇଥିଲା । ଏହି ତିନି କୃଷି ଆଇନକୁ ପ୍ରତ୍ୟାହାର କରିବା ଲାଗି ପ୍ରାୟ ୨ କୋଟି ଦସ୍ତଖତକାରୀ ରାଷ୍ଟ୍ରପତିଙ୍କ ହସ୍ତକ୍ଷେପ ଲୋଡିଛନ୍ତି ବୋଲି କଂଗ୍ରେସ ପକ୍ଷରୁ କୁହାଯାଇଛି ।