ଫୁଟବଲ ମହାକୁମ୍ଭର ମହାମୁକାବିଲା
ଭୁବନେଶ୍ୱର(ବଡ଼ ଖବର ବ୍ୟୁରୋ):ୟୁରୋ ଓ କୋପା ଆମେରିକାର ଫାଇନାଲ ଲାଇନ ଅପ୍ ଚୂଡ଼ାନ୍ତ ହୋଇଛି । ବିଶ୍ୱର ଦୁଇ ମହାଦେଶରେ ଚାଲିଥିବା ଫୁଟବଲର ଏହି ଦୁଇ ମହାକୁମ୍ଭର ଫାଇନାଲ ଅନୁଷ୍ଠିତ ହେବ । ଯଦି ଆମେ ୟୁରୋ କପ୍-୨୦୨୧ କଥା ଦେଖିବା ଜୁଲାଇ ୧୨ରେ ଫାଇନାଲ ମ୍ୟାଚ୍ ଅନୁଷ୍ଠିତ ହେବ । ମୁହାଁମୁହିଁ ହେବେ ଇଂଲଣ୍ଡ ଏବଂ ଇଟାଲି । ପ୍ରଥମ ସେମିଫାଇନାଲରେ ପେନାଲ୍ଟି ଶୁଟ୍ଆଉଟରେ ସ୍ପେନକୁ ୪-୨ ଗୋଲରେ ହରାଇ ଇଟାଲି ଫାଇନାଲରେ ନିଜ ସ୍ଥାନ ପକ୍କା କରିଛି । ଉଭୟ ଦଳଙ୍କୁ ଗୋଲ କରିବାର ଏକାଧିକ ସୁଯୋଗ ମିଳିଥିଲା, ତେବେ ହାତଛଡ଼ା ହୋଇଥିଲା । ମ୍ୟାଚର ୬୦ତମ ମିନିଟରେ ଇଟାଲିର ଫେଡରିକୋ ଚିଏସା ଗୋଲ କରି ଦଳକୁ ୧-୦ରେ ଆଗୁଆ କରିଥିଲେ ।
୮୦ ତମ ମିନିଟରେ ସ୍ପେନ ପକ୍ଷରୁ ଅଲଭୋରା ମୋରାଟ ଗୋଲ ଦେଇ ମ୍ୟାଚକୁ୧-୧ ସ୍ଥିତିକୁ ଆଣିଥିଲେ । ଖେଳର ଅତିରିକ୍ତ ୩୦ ମିନିଟ ବଢାଯାଇଥିଲା କିନ୍ତୁ ଫଳାଫଳ ନବାହାରିବାରୁ ଶୁଟ୍ ଆଉଟ୍ ହୋଇଥିଲା । ଇଟାଲି ଲଗାତର ୪ ଗୋଲ କରିଥିବା ବେଳେ ସ୍ପେନ୍ ୨ଟି ଗୋଲ କରିଥିଲା । ଅନ୍ୟ ଏକ ସେମିଫାଇନାଲରେ ଦୀର୍ଘ ୫୫ ବର୍ଷର ଅନ୍ତ ଘଟାଇ ଇଂଲଣ୍ଡ କୌଣସି ଏକ ବଡ଼ ଟୁର୍ଣ୍ଣାମେଣ୍ଟର ଫାଇନାଲକୁ ଯାଇଛି । ଡେନମାର୍କକୁ ୨-୧ ଗୋଲରେ ହରାଇ ଫାଇନାଲରେ ପହଞ୍ଚିଛି ଦଳ । ଅତିରିକ୍ତ ମିନିଟରେ ଇଂଲିଶ ଅଧିନାୟକ ହ୍ୟାରି କେନ୍ ଚମକ୍ରାର ଗୋଲ ଦେଇ ଦଳକୁ ବିଜୟୀ କରାଇଥିଲେ । ଜୁଲାଇ ୧୨ରେ ୱେମ୍ବଲି ଷ୍ଟାଡିୟମରେ ଇଟାଲି ଏବଂ ଇଂଲଣ୍ଡ ୟୁରୋ କପ୍ ପାଇଁ ମୁହାଁମୁହିଁ ହେବେ । ସେହିଭଳି କୋପା ଆମେରିକା କପର ଫାଇନାଲରେ ମୁହାଁମୁହିଁ ହେବେ ବ୍ରାଜିଲ ଓ ଆର୍ଜେଣ୍ଟିନା । ଜୁଲାଇ ୧୧ରେ ବ୍ରାଜିଲର ମାରାସାନା ଷ୍ଟାଡିୟମରେ ଏହି ମ୍ୟାଚ ଅନୁଷ୍ଠିତ ହେବ ।
ପ୍ରଥମ ସେମିଫାଇନାଲରେ ପେରୁକୁ ୧-୦ରେ ହରାଇ ବ୍ରାଜିଲ ଫାଇନାଲ ଟିକେଟ ହାତେଇଥିବା ବେଳେ ଦ୍ୱିତୀୟ ସେମିଫାଇନାଲରେ ଆର୍ଜେଣ୍ଟିନା ୩-୨ରେ କଲମ୍ବିଆକୁ ପରାସ୍ତ କରିଛି । ଟାଇବ୍ରେକରରେ ଏହି ଫଇସଲା ହୋଇଥିଲା । ନିର୍ଦ୍ଧାରିତ ସମୟରେ ସ୍ଥିତି ୧-୧ରେ ବରାବର ଥିଲା । ମ୍ୟାଚ ଅତିରିକ୍ତ ମିନିଟକୁ ଯାଇଥିଲା । ଶେଷରେ ଆର୍ଜେଣ୍ଟିନା ଶୁଟ୍ ଆଉଟରେ ବିଜୟୀ ହୋଇ ଫାଇନାଲକୁ ଯାଇଛି । ଗୋଲକିପର ଏମିଲିଆନୋ ମାର୍ଟିନେଜ ୩ଟି ପେନାଲ୍ଟି ଅଟକାଇ ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ