କେବେ ମିଳିବ ସହାୟତା

ଦଶପଲ୍ଲା (ବଡ଼ ଖବର ବ୍ୟୁରୋ): ଜୀବନ କେବେ ପତର ତଳେ ତ ଆଉ କେବେ ପଥର ତଳେ । ଜୀବନ ଯେଉଁଠି ଯାତନା ସେଇଠି । ଦୁଃଖୀ ମଣିଷଙ୍କ ଜୀବନରେ ଦୁଃଖ ହିଁ ଚିର ସହଚର । ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ମଧ୍ୟଖଣ୍ଡ ପଞ୍ଚାୟତ ମର୍ଦାବାଡ଼ି ଗାଁରେ ଏମିତି କିଛି ଲୋକ ଅଛନ୍ତି ଯେଉଁମାନଙ୍କ ଦୁଃଖ ନକହିବା ଭଲ ।ନିଆଁ ଲାଗି ଘର ପୋଡ଼ି ଯାଇଥିଲେ ସୁଦ୍ଧା ଏଯାବତ ସେମାନଙ୍କୁ ମିଳୁନି ସରକାରୀ ସହାୟତା । ଶେଷରେ ବାଧ୍ୟ ହୋଇ ସେମାନେ ଗୁହାଳଘରେ କାଟୁଛନ୍ତି ଜୀବନ । କୃପାସିଦ୍ଧୁ ରଣା, ଉପେନ୍ଦ୍ର ରଣା ଏବଂ ରମେଶ ରଣାଙ୍କ ଘର ପୋଡ଼ି ଯାଇଛି । ଦୀର୍ଘଦିନ ଘର ପୋଡ଼ିଯାଇଥିଲେ ସୁଦ୍ଧା ସରକାରୀ ସହାୟତା ଏମାନଙ୍କ ଲାଗି ସାତସପନ ପାଲଟିଯାଇଛି । ରାଜନେତାଙ୍କଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କୁ ଗୁହାରି କରିଥିଲେ ସୁଦ୍ଧା କିଛି ସୁଫଳ ମିଳିନାହିଁ । ଘର ନଥିବାରୁ ଏମାନେ ବାଧ୍ୟ ହୋଇ ଗୁହାଳଘରେ କାଟୁଛନ୍ତି ଦିନ । ଏମାନଙ୍କୁ ଶୀଘ୍ର ଆବାସ ଯୋଜନାରେ ପକ୍କାଘର ଯୋଗାଇ ଦିଆଯାଉ ବୋଲି ଗାଁଲୋକେ ଦାବି କରିଛନ୍ତି ।