ହସଖୁସିର ଯାତ୍ରା ହେଲା ଶେଷଯାତ୍ରା

ଢେଙ୍କାନାଳ (ବଡ଼ ଖବର ବ୍ୟୁରୋ): ହସଖୁସିର ଯାତ୍ରା ହେଲା ଶେଷଯାତ୍ରା। ପୋଖରୀରେ ବରଯାତ୍ରୀ ଗାଡ଼ି ବୁଡ଼ି ଚାଲିଗଲା ୫ ଜଣଙ୍କ ଜୀବନ। ଢେଙ୍କାନାଳ ସଦର ଥାନା ଇନ୍ଦିପୁର-ଛାଟିଆ ଗାଁ ନିକଟରେ ବିଳମ୍ବିତ ରାତିରେ ଘଟିଛି ଛାତିଥରା ଦୁର୍ଘଟଣା। ପୋଖରୀ ମଧ୍ୟରେ ବରଯାତ୍ରୀ କାର ପଶିଯିବାରୁ କାରରେ ଥିବା ୭ଜଣ ସାଙ୍ଗଙ୍କ ମଧ୍ୟରୁ ୫ ଜଣଙ୍କର ମୃତ୍ୟୁ ହୋଇଛି । ମୋଟଙ୍ଗା ଥାନା ବାଙ୍ଗୁରସିଂହ ଗ୍ରାମରୁ ଏକ ବାହାଘର ଗତ ରାତିରେ ସଦର ଥାନା ଇନ୍ଦିପୁର ଗ୍ରାମ ଝିଅ ଘରକୁ ଆସିଥିଲା । ଏହି ବାହାଘରରେ ପୁଅର ୭ଜଣ ସାଙ୍ଗ ଏକ କାର ଯୋଗେ ବରଯାତ୍ରୀ ହୋଇ ଆସିଥିଲେ ।

ଇନ୍ଦିପୁର ବାହାଘରରେ ଯୋଗ ଦେଇ ବିଳମ୍ବିତ ରାତ୍ରିରେ ଘରକୁ ଫେରୁଥିଲେ । ଛାଟିଆ ନିକଟ ପୋଖରୀରେ ସେମାନଙ୍କୁ ଯମ ଜଗି ବସିଥିଲା । କେହି କିଛି ବୁଝିବା ପୂର୍ବରୁ ହଠାତ କାରଟି ପୋଖରୀ ନିକଟରେ ପଶିଯାଇଥିଲା । କାରଟି ପାଣିରେ ବୁଡି ଯିବାରୁ ପାଣି ଭିତରେ ଜୀବନ ମରଣ ସହିତ ସଂଗ୍ରାମ କରି ବବୁଲ ଓ ଶିବୁ କାରର ଡୋର ଭାଙ୍ଗି ନିଜର ଜୀବନ ବଞ୍ଚାଇ ଦେଇଥିଲେ ।

ଅନ୍ୟ ୫ଜଣ ସାଙ୍ଗ ଗାଡି ଭିତରେ ରହିଥିବା ବେଳେ ଗ୍ରାମବାସୀମାନେ ଉଦ୍ଧାର କରିଥିଲେ । ହେଲେ ସେତେବେଳକୁ ସମସ୍ତଙ୍କର ଜୀବନ ଚାଲିଯାଇଥିଲା । ମୃତକମାନେ ବାଙ୍ଗୁର ସିଂହ ଗ୍ରାମର ଡ୍ରାଇଭର ଚନ୍ଦ୍ରକାନ୍ତ ସ୍ୱାଇଁ, ଅବିନାଶ ସାହ, ରାକେଶ ସାହୁ, ଶ୍ରୀରାମ ସାହୁ ଏବଂ ଅଭିଜିତ ସାହୁ ବୋଲି ଜଣାପଡିଛି। ମୃତଦେହ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ବେଳେ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି।