ଆଜି ମୁମ୍ବାଇର ବିଜୟଧାରାକୁ ଅଟକାଇ ପାରିବ କି ପଞ୍ଜାବ

ଦୁବାଇ, (ବଡ଼ ଖବର ବ୍ୟୁରୋ): ଆଇପିଏଲ ତ୍ରୟୋଦଶ ସିଜିନର ୩୬ତମ ମ୍ୟାଚରେ ମୁହାଁମୁହିଁ ହେବେ ମୁମ୍ବାଇ ଇଣ୍ଡିଆନ୍ସ ଓ କିଙ୍ଗସ୍ ଏକାଦଶ ପଞ୍ଜାବ। ରୋହିତ ଶର୍ମାଙ୍କୁ ଟକ୍କର ଦେବେ କେ.ଏଲ୍. ରାହୁଲ। ଉଭୟ ଦଳ ଆଜି ସେମାନଙ୍କ ନବମ ମ୍ୟାଚ ଦୁବାଇରେ ଖେଳିବେ। ଚଳିତ ସିଜିନରେ ମୁମ୍ବାଇ ଦମଦାର ପ୍ରଦର୍ଶନ କରି ୮ଟି ମ୍ୟାଚରୁ ୬ଟିରେ ବିଜୟୀ ହୋଇ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ରହିଛି। ସେହିଭଳି ପଞ୍ଜାବ ୮ଟି ମ୍ୟାଚରୁ ୨ଟି ବିଜୟ ସହ ପଏଣ୍ଟ ଟେବୁଲର ଶେଷ ସ୍ଥାନରେ ରହିଛି। ଆଇପିଏଲ ଇତିହାସରେ ଉଭୟ ଦଳ ୨୫ଥର ସାମ୍ନାସାମ୍ନି ହୋଇଛନ୍ତି। ମୁମ୍ବାଇ ୧୪ଥର ଏବଂ ପଞ୍ଜାବ ୧୧ଥର ବିଜୟୀ ହୋଇଛନ୍ତି। ଚଳିତ ସିଜିନରେ ଏହି ଦୁଇ ଦଳ ମଧ୍ୟରେ ଖେଳାଯାଇଥିବା ମ୍ୟାଚରେ ମୁମ୍ବାଇ ପଞ୍ଜାବକୁ ୪୮ରନରେ ପରାସ୍ତ କରିଛି। ଆଜିର ମ୍ୟାଚକୁ ପଞ୍ଜାବ ଜିତି ପ୍ରତିଶୋଧ ନେବାକୁ ଚେଷ୍ଟା କରିବ। ଆଗକୁ ଥିବା ସମସ୍ତ ମ୍ୟାଚ ପଞ୍ଜାବ ପାଇଁ କର ବା ମର ସ୍ଥିତିରେ ରହିଛି। ପଏଣ୍ଟ ଟେବୁଲରେ ଟପ-୪ ଦଳ ମଧ୍ୟରେ ରହିବାକୁ ହେଲେ ପଞ୍ଜାବ ସମସ୍ତ ମ୍ୟାଚ ଜିତିବା ଆବଶ୍ୟକ। ଅପରପକ୍ଷରେ ମୁମ୍ବାଇ ଚଳିତ ସିଜିନରେ ଦମଦାର ପ୍ରଦର୍ଶନ କରିଛି। ଆଜିର ମ୍ୟାଚ ଜିତି ମୁମ୍ବାଇ ପଏଣ୍ଟ ଟେବୁଲର ଶୀର୍ଷକୁ ଯିବାକୁ ଚେଷ୍ଟା କରିବ।