ମୁକ୍ତ ହେବେ ଆଇଏସଆଇଏସ ଆତଙ୍କବାଦୀ
(ବଡ଼ ଖବର ବ୍ୟୁରୋ): ଆଫଗାନିସ୍ତାନରୁ ଆମେରିକା ସୈନ୍ୟ ପ୍ରତ୍ୟାହାର କରିବାପରେ ତାଲିବାନ ଆତଙ୍କୀମାନେ ବେଶ୍ ଖୁସି । ତେଣେ ଆତଙ୍କବାଦୀଙ୍କ ବିରୋଧରେ ଅପରେସନ ଚଳାଇବା ପାଇଁ ରାଷ୍ଟ୍ରପତି ଜୋ ବାଇଡେନ ନୂତନ ରଣନୀତି ପ୍ରସ୍ତୁତ କରିବା ଆରମ୍ଭ କରିଛନ୍ତି। ଆଗାମୀ ଦିନରେ ଆମେରିକା ଆଇଏସଆଇ ଏବଂ ଅଲ କାଏଦା ଭଳି ଆତଙ୍କବାଦୀ ସଂଗଠନ ବିରୋଧରେ ଏୟାର ଷ୍ଟ୍ରାଇକ୍ କରିପାରେ । ଆମେରିକା କହିଛି ତାଲିବାନଙ୍କ ସାହାଯ୍ୟ ବିନା ଆଫଗାନିସ୍ତାନରୁ ଆତଙ୍କବାଦୀଙ୍କୁ ହଟାଇବା କଷ୍ଟକର।
ଆଫଗାନିସ୍ତାନରେ ଆମେରିକାର ୨୦ ବର୍ଷ ଯୁଦ୍ଧ ସମୟରେ ବହୁ ଆତଙ୍କବାଦୀଙ୍କୁ ବନ୍ଦୀ କରାଯାଇଥିଲା । ଏହି ବନ୍ଦୀମାନଙ୍କୁ ମୁକ୍ତ କରିବା ପାଇଁ ତାଲିବାନ ନିଷ୍ପତ୍ତି ନେଇଛି । ଏହି ନିଷ୍ପତ୍ତି ଅନୁସାରେ ଅତି କମରେ ୨,୦୦୦ ଆଇଏସଆଇଏସ ଆତଙ୍କବାଦୀ ମୁକ୍ତ ହେବେ । ଏହି ଆତଙ୍କବାଦୀମାନେ ମୁକ୍ତ ହେଲେ ଆଫଗାନିସ୍ତାନରେ ହଇଚଇ ସୃଷ୍ଟି କରିପାରନ୍ତି। ଆମେରିକାର ସେନା ଜେନେରାଲ ମାର୍କ ମିଲି କହିଛନ୍ତି, ତାଲିବାନ ଏକ ନିଷ୍ଠୁର ସଂଗଠନ। ତାଲିବାନ ସହ ଆମେରିକାର ସମ୍ପର୍କ ରଖିବା ବିଷୟରେ ହେଉଥିବା ଆଲୋଚନା ନିରାଧାର । କିନ୍ତୁ ଆଇଏସଆଇଏସକୁ ହଟାଇବା ପାଇଁ ଉଭୟଙ୍କୁ ଏକାଠି ହେବାକୁ ପଡ଼ିବ।