ଚଢ଼ା ଦରରେ କିରୋସିନ ବିକି ଚାକିରି ଗଲା

ବଲାଙ୍ଗିର (ବଡ଼ ଖବର ବ୍ୟୁରୋ): ବଲାଙ୍ଗିର ଜିଲ୍ଲା ସଇଁନ୍ତଳା ବ୍ଲକ ଭଦ୍ରା ପଞ୍ଚାୟତରେ କିରୋସିନ ଚଢ଼ା ଦରରେ ବିକ୍ରି କରିବା ମହଙ୍ଗା ପଡ଼ିଲା । ଚାକିରିରୁ ବହିଷ୍କୃତ ହେଲେ ଯୋଗାଣ ସହାୟକ ସତ୍ୟ ଛତ୍ରିଆ । ଅଭିଯୋଗ ଅନୁସାରେ, ଗତ ଜୁନ ଓ ଜୁଲାଇ ମାସରେ କିରୋସିନି ଚଢ଼ା ଦରରେ ବିକ୍ରି ହୋଇଥିଲା । ଏନେଇ ସୂଚନା ଅଧିକାର କର୍ମୀ ବଳଦେବ କୁମାର ସୂଚନା ଅଧିକାର ଆଇନ ଅନୁଯାୟୀ ତଥ୍ୟ ମାଗିଥିଲେ ଯେ କାହିଁକି ଚଢ଼ା ଦରରେ କିରୋସିନ ବିକ୍ରି ହୋଇଛି। ଏପରିକି କରୋନା ମହାମାରୀ ସମୟରେ ୧୫ ଟଙ୍କା ମଧ୍ୟରେ କିରୋସିନି ବଣ୍ଟା ଯିବାକୁ ଥିଲେ ମଧ୍ୟ ଚଢ଼ା ଦରରେ ବିକ୍ରି କରାଯାଉଥିଲା ।
ଟିଟିଲାଗଡ଼ ଉପଜିଲ୍ଲାପାଳ ସୋମେଶ ଉପାଧ୍ୟାୟଙ୍କ ନିର୍ଦ୍ଦେଶ କ୍ରମେ ଟିଟିଲାଗଡ଼ ଅତିରିକ୍ତ ତହସିଲଦାର ଉକ୍ତ ପଞ୍ଚାୟତର ବିଭିନ୍ନ ଗ୍ରାମକୁ ଯାଇ ଘଟଣାର ତଦନ୍ତ କରିବା ପରେ ଅଭିଯୋଗର ସତ୍ୟତା ଥିବା ଜାଣିବାକୁ ପାଇଥିଲେ । ପରେ ଭଦ୍ରା ଯୋଗାଣ ସହାୟକ ସତ୍ୟ ଛତ୍ରିଆଙ୍କୁ ଚାକିରିରୁ ବହିଷ୍କୃତ କରାଯାଇଛି ।
ଏଥିସହ ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ସତ୍ୟପ୍ରିୟ ସାହୁଙ୍କୁ ଚେତାବନୀ ଦିଆଯାଇଛି। ଆଗାମୀ ଦିନରେ ଏଭଳି ଭୁଲ ହେଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରଶାସନ ପକ୍ଷରୁ ଚେତାବନୀ ଦିଆଯାଇଛି। ତେବେ ପଞ୍ଚାୟତରେ ବ୍ୟାପକ ଦୁର୍ନୀତି ହେଉଥିବାରୁ ଭିଜିଲାନ୍ସ ତଦନ୍ତ ପାଇଁ ସାଧାରଣରେ ଦାବି ହେଉଛି।