ପ୍ରଥମେ ସମାଧାନ, ପରେ କାମ

ବଲାଙ୍ଗିର (ବଡ଼ ଖବର ବ୍ୟୁରୋ): ଦୀର୍ଘ ଦୁଇ ବର୍ଷ ହେବ ବନ୍ଦ ରହିଛି ବଲାଙ୍ଗିର ଜିଲ୍ଲାର ଜୀବନ ରେଖା କୁହାଯାଉଥିବା ଲୋୟର ସୁକତେଲ ଜଳସେଚନ ପ୍ରକଳ୍ପ କାର୍ଯ୍ୟ। ବିସ୍ଥାପିତଙ୍କ ତୀବ୍ର ବିରୋଧ ଯୋଗୁ ପ୍ରକଳ୍ପ କାର୍ଯ୍ୟ ଆଗେଇ ପାରୁନାହିଁ। ପ୍ରଥମେ ସମସ୍ୟାର ସମାଧାନ କର, ତାପରେ ପ୍ରକଳ୍ପ କାମ ହେବ ବୋଲି ରୋକଠୋକ ଚେତାବନୀ ଦେଇଛନ୍ତି ବିସ୍ଥାପିତ। ଆଜି ବଲାଙ୍ଗିର ଜିଲ୍ଲା ଯାଦବ ଭବନରେ ବୁଡ଼ି ଅଞ୍ଚଳ ଅଗ୍ରଗାମୀ ସଂଘ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇ ସଂଘ ସଭାପତି ଉପେନ୍ଦ୍ର ସାହୁ କହିଛନ୍ତି, ୨୦୧୩ ଆଇନ ଅନୁସାରେ ସମସ୍ତ ବିସ୍ଥାପିତଙ୍କୁ ଥଇଥାନ ଓ କ୍ଷତିପୂରଣ ରାଶି ପ୍ରଦାନ କରାଯାଉ। ପ୍ରକଳ୍ପ ଦ୍ୱାରା ପ୍ରଭାବିତ ଲୋକଙ୍କ ସମସ୍ୟା ସମାଧାନ କରିବା ପରେ ପ୍ରକଳ୍ପ କାର୍ଯ୍ୟ ତ୍ୱାରାନ୍ୱିତ କରଯାଉ। ନଚେତ କାର୍ଯ୍ୟ ଆରମ୍ଭ କରିବାକୁ ଦିଆଯିବ ନାହିଁ ବୋଲି କହିଛନ୍ତି ଉପେନ୍ଦ୍ର।
ଅନ୍ୟପଟେ ଚଳିତ ମାସ ପ୍ରଥମ ସପ୍ତାହରୁ କାର୍ଯ୍ୟ ଆରମ୍ଭ କରିବା ପାଇଁ ପ୍ରକ୍ରିୟା ଚାଲିଥିଲା। ଏନେଇ ସ୍ଥାନୀୟ ବିଧାୟକ ନରସିଂହ ମିଶ୍ର ମଧ୍ୟ ଗଣମାଧ୍ୟମକୁ ସୂଚନା ଦେଇଥିଲେ। ଏଥିପାଇଁ ଜଳସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀଙ୍କ ସହ ଏକ ଉଚ୍ଚସ୍ତରୀୟ ଟିମ ପ୍ରକଳ୍ପ ଅଞ୍ଚଳ ପରିଦର୍ଶନରେ ଆସିଥିଲେ। ହେଲେ ବିସ୍ଥାପିତଙ୍କ ପ୍ରବଳ ବିରୋଧ ଯୋଗୁ ସେମାନେ ପ୍ରକଳ୍ପ ଅଞ୍ଚଳ ତଦାରଖ କରି ନ ପାରି ଫେରି ଯାଇଥିଲେ। ଏ ଭିତରେ ମାସର ଦ୍ଵିତୀୟ ସପ୍ତାହ ବିତି ଯାଇଥିଲେ ମଧ୍ୟ ପ୍ରକଳ୍ପର ଅଗ୍ରଗତି ନେଇ କୌଣସି ସୂଚନା ମିଳିନାହିଁ। ତେଣୁ ପ୍ରକଳ୍ପ କାର୍ଯ୍ୟ ପୁଣି ଅନିଶ୍ଚିତତା ଭିତରକୁ ଠେଲି ହୋଇଯାଇଛି।