ମୋଦି ସରକାର ଡାକିଲେ ସ୍ୱତନ୍ତ୍ର ଅଧିବେଶନ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ମୋଦି ସରକାର ଡାକିଲେ ସ୍ୱତନ୍ତ୍ର ଅଧିବେଶନ । ସେପ୍ଟେମ୍ବର ୧୮ରୁ ୨୨ ତାରିଖ ୫ ଦିନ ଉଭୟ ଲୋକସଭା ଓ ରାଜ୍ୟସଭା ଚାଲିବ । ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବ । ଏନେଇ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ସୂଚନା ଦେଇଛନ୍ତି । ଅମୃତ କାଳରେ ଅନୁଷ୍ଠିତ ହେଉଥିବା ଏହି ବିଶେଷ ଅଧିବେଶ କାଳରେ ଆର୍ଥିକ ଚର୍ଚ୍ଚାକୁ ନେଇ ଆଶାନ୍ୱିତ ଥିବା ସେ ଉଲ୍ଲେଖ କରିଛନ୍ତି । କେଉଁ କାରଣ ପାଇଁ କେନ୍ଦ୍ର ମୋଦି ସରକାର ସ୍ୱତନ୍ତ୍ର ଅଧିବେଶନ ଡାକିଲେ ତାହା ସ୍ପଷ୍ଟ ହୋଇନାହିଁ । ତେବେ ସଂସଦର ଏହି ବିଶେଷ ଅଧିବେଶନର ଏଜେଣ୍ଡା ସଂପର୍କରେ କିଛି କୁହାଯାଇନାହିଁ । ଏହାରି ଭିତରେ ଚର୍ଚ୍ଚା ହେଉଛି ସରକାର ଭାଙ୍ଗି ଆଗୁଆ ହୋଇପାରେ ନିର୍ବାଚନ । ଆଗକୁ ଅଛି ୫ ରାଜ୍ୟ ଛତିଶଗଡ଼, ମଧ୍ୟପ୍ରଦେଶ, ରାଜସ୍ଥାନ, ମିଜୋରାମ ଓ ତେଲେଙ୍ଗାନାରେ ବିଧାନସଭା ନିର୍ବାଚନ । ଏହି ସମୟରେ ଲୋକସଭା ନିର୍ବାଚନ ହେବ କି ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି । ସେପଟେ ବିରୋଧୀ ମେଂଟ ଇଣ୍ଡିଆ କହିଆସୁଛନ୍ତି ଯେ ମୋଦି ସରକାର ଆଗୁଆ ନିର୍ବାଚନ କରିପାରନ୍ତି । ନିୟମିତ ସମୟ ପୂର୍ବରୁ ଲୋକସଭା ନିର୍ବାଚନ କରିପାରନ୍ତି ବୋଲି ମମତା ବାନାର୍ଜୀ ଓ ନୀତିଶ କୁମାର କହିଥିଲେ ।