ଦିବ୍ୟାଙ୍ଗଙ୍କୁ ମିଳୁନି ସରକାରୀ ସହାୟତା

ମାଲକାନଗିରି (ବଡ଼ ଖବର ବ୍ୟୁରୋ): ବାଟ ହୁଡ଼ୁଛି ସରକାରୀ ଯୋଜନା । ଗରିବଙ୍କ ଲାଗି କରାଯାଇଥିବା ମାଳ ମାଳ ଯୋଜନାର ଫାଇଦା ଉଠାଇ ପାରୁନାହାନ୍ତି ଯୋଗ୍ୟ ହିତାଧିକାରୀ । ମାଲକାନଗିରି ଜିଲ୍ଲା କାଲିମେଳା ବ୍ଲକ ଏମଭି-୮୦ ଗାଁରେ ଦେଖିବାକୁ ମିଳିଛି ଏହାର ଜ୍ୱଳନ୍ତ ଉଦାହରଣ । ଏହି ଗାଁର ତାରା ରାଓଙ୍କ ଗୋଟିଏ ହାତ ୧୦ ବର୍ଷ ତଳେ କଟିଯାଇଛି । ଗୋଟିଏ ହାତରେ ପଥର ବାଡ଼େଇ ଯାହା ରୋଜଗାର କରନ୍ତି ସେତିକିରେ ପରିବାର ଚଳୁଛି । ସରକାରୀ ସହାୟତାଙ୍କ ତାଙ୍କ ଲାଗି ସାତସପନ ।

ତିନି ଛୁଆ ଓ ସ୍ତ୍ରୀଙ୍କୁ ନେଇ ତାରାଙ୍କ ପରିବାର । ଗୋଟିଏ ହାତରେ ପଥର ବାଡ଼େଇ ତାରା ଯାହା ରୋଜଗାର କରୁଛନ୍ତି ସେତିକିରେ ୫ପ୍ରାଣୀ କୁଟୁମ୍ବ ଚଳିବାକୁ ଅକ୍ଷମ । ଗରିବ, ଦିବ୍ୟାଙ୍ଗ ହୋଇଥିଲେ ସୁଦ୍ଧା ତାରାଙ୍କୁ ମିଳିନାହିଁ ଆବାସ ଯୋଜନା । ରାସନକାର୍ଡ଼ରୁ ମଧ୍ୟ ବଞ୍ଚିତ ହୋଇଛନ୍ତି ସେ । ସରପଞ୍ଚଙ୍କଠାରୁ ଆରମ୍ଭ କରି ଜିଲ୍ଲାପାଳଙ୍କୁ ଗୁହାରି କରିଥିଲେ ସୁଦ୍ଧା କେହି ତାଙ୍କ କଥାକୁ ଗୁରୁତ୍ୱ ଦେଇନଥିବା କହିଛନ୍ତି ତାରା । ଗୋଟିଏ ହାତରେ ପଥର ବାଡ଼େଇ ପରିବାର ଚଳାଇବା କେତେ ଯେ କଷ୍ଟ ଏହା କହି ଭୋ ଭୋ ହୋଇ କାନ୍ଦି ପକାଇଥିଲେ ତାରା । ସରକାରୀ ସହାୟତା ମିଳିଲେ ପରିବାର ଭଲରେ ଚଳନ୍ତା ବୋଲି ‘ବଡ଼ ଖବର’କୁ କହିଛନ୍ତି ତାରା ।