ବିଜେଡିରେ ସାମିଲ ହେବେ ପ୍ରଦୀପ

ନବରଙ୍ଗପୁର(ବଡ଼ ଖବର ବ୍ୟୁରୋ) :   ସବୁ କଳ୍ପନାଜଳ୍ପନାର ଅନ୍ତ ଘଟିଲା । ନିକଟରେ କଂଗ୍ରେସ ଛାଡିଥିବା ପ୍ରଦୀପ ମାଝୀ ଏବେ ବିଜେଡିରେ ସାମିଲ ହେବେ । ଆଜି ନବରଙ୍ଗପୁରରେ ଏକ ସାମ୍ବାଦିକ ସମ୍ମିଳନୀରେ ଏ ନେଇ ସେ ଘୋଷଣା କରିଛନ୍ତି । ତେବେ ପ୍ରଦୀପ କେବେ ବିଜେଡିରେ ମିଶିବେ, ସେ ନେଇ କିଛି ସ୍ପଷ୍ଟ ସୂଚନା ମିଳିନି । ତେବେ ୨୮ ରୁ ୩୦ ତାରିଖ ମଧ୍ୟରେ ସେ ବିଜେଡିରେ ଯୋଗ ଦେବେ ।

ଆଜି ସାମ୍ବାଦିକ ସମ୍ମିଳନୀରେ ପ୍ରଦୀପ ବିଜେଡି ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରିଛନ୍ତି । ସେ କହିଛନ୍ତି ଯେ, ବିଜେଡି ରାଜ୍ୟରେ ସ୍ଥିର ସରକାର ଦେବାରେ ସଫଳ ହୋଇଛି । ପ୍ରତି ନିର୍ବାଚନରେ ସେ ସଂଖ୍ୟା ବୁଦ୍ଧି କିରିବାରେ ଦେଶରେ ଇତିହାସ ରଚିଛି । ପ୍ରଦୀପ କହିଛନ୍ତି, କଂଗ୍ରେସ ସହ ବର୍ତ୍ତମାନ ପାଦ ମିଶାଇ ଚାଲିବା ଅସମ୍ଭବ । କଂଗ୍ରେସରେ ରହି ଅବିଭକ୍ତ କୋରାପୁଟର ବିକାଶ କରି ହେବ ନାହିଁ ।

ଦୁଇ ଦିନ ତଳେ ପ୍ରଦୀପ କଂଗ୍ରେସରୁ ଇସ୍ତଫା ଦେଇଥିଲେ । ସେ ତାଙ୍କ ଇସ୍ତଫା ପତ୍ର ଦଳର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧିଙ୍କ ନିକଟକୁ ପଠାଇଥିଲେ । ସେ ତାଙ୍କ ଇସ୍ତଫା ପତ୍ରରେ କଂଗ୍ରେସ ସାଂଗଠାନିକ ସ୍ତରରେ ଦୁର୍ବଳ ହୋଇଯାଇଛି ବୋଲି ଦର୍ଶାଇଥିଲେ ।