ରାଜଭବନରେ ରାଷ୍ଟ୍ରପତି
ଭୁବନେଶ୍ୱର(ବଡ଼ ଖବର ବ୍ୟୁରୋ): ରାଷ୍ଟ୍ରପତି ରାମନାଥ କୋବିନ୍ଦ ୩ ଦିନିଆ ଓଡ଼ିଶା ଗସ୍ତରେ ଆସି ରାଜଭବନରେ ପହଞ୍ଚିଛନ୍ତି । ବାୟୁ ସେନାର ସ୍ୱତନ୍ତ୍ର ବିମାନରେ ରାଷ୍ଟ୍ରପତି ଭୁବନେଶ୍ୱର ବିମାନବନ୍ଦରରେ ଶନିବାର ଅପରାହ୍ନ ୬ଟା ୨୨ରେ ଅବତରଣ କରିଥିଲେ । ବିମାନବନ୍ଦରରେ ତାଙ୍କୁ ରାଜ୍ୟପାଳ ପ୍ରଫେସର ଗଣେଶୀ ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡଙ୍ଗୀ, ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ, ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ଡିଜି ଅଭୟ ପ୍ରମୁଖ ସ୍ୱାଗତ କରିଥିଲେ । ସେଠାରୁ ରାଷ୍ଟ୍ରପତି ସିଧା ରାଜଭବନରେ ପହଞ୍ଚିଲେ ।
ସେଠାରେ ରବିବାର ରାତ୍ରି ଯାପନ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ରବିବାର ସରାଳେ ୯ ଟା ୩୦ ରେ ଭୁବନେଶ୍ୱର ବିମାନ ବନ୍ଦରରେ ପହଞ୍ଚିବେ । ସେଠାରୁ ୯ ଟା ୪୫ ରେ ବାୟୁସେନା ବିମାନରେ ରାଉରକେଲା ଅଭିମୁଖେ ଯାତ୍ରା କରିବେ । ଝାରସୁଗୁଡା ବିମାନ ବନ୍ଦରରେ ଅବତରଣ କରି ସେଠାରୁ ସ୍ୱତନ୍ତ୍ର ହେଲିକପ୍ଟରରେ ଯାଇ ରାଉରକେଲାର ଏୟାରଷ୍ଟ୍ରିପରେ ସକାଳ ୧୦ ଟାରେ ୩୫ରେ ଅବତରଣ କରିବେ । ପୂର୍ବାହ୍ନ ୧୧ଟାରେ ଏନଆଇଟିର ସମାବର୍ତ୍ତନ ଉତ୍ସବରେ ଯୋଗଦେବେ ରାଷ୍ଟ୍ରପତି । ସେଠାରେ ଘଣ୍ଟାଏ ପର୍ଯ୍ୟନ୍ତ ରହିବେ । ପରେ ସେ ରାଉରକେଲା ହାଉସରେ ମଧ୍ୟାହ୍ନ ଭୋଜନ ସାରି ବିଶ୍ରାମ ନେବେ ।
ଅପରାହ୍ନ ୩ ଟା ୪୫ ରେ ଆରଏସପି ପରିଦର୍ଶନରେ ଯିବେ । ସେଠାରୁ ଫେରି ରାଉରକେଲା ସୁପର ସ୍ୱେସିଆଲିଟି ହସ୍ପିଟାଲ ଓ ଆରଏସପି ପିଜି ମେଡିକାଲ ଇନଷ୍ଟିଚ୍ୟୁଟ ଉଦଘାଟନ କରି ଭୁବନେଶ୍ୱର ଫେରି ପୁଣି ରାଜଭବନରେ ରାତ୍ରୀଯାପନ କରିବେ । ୨୨ ତାରିଖ ସକାଳ ୯ ଟା ୫ ରେ ସ୍ୱତନ୍ତ୍ର ହେଲିକପ୍ଟରରେ ପୁରୀ ଗସ୍ତ କରିବେ । ସେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରି ବିଶ୍ୱପ୍ରସିଦ୍ଧ କୋଣାର୍କ ସୂର୍ଯ୍ୟମନ୍ଦିର ପରିଦର୍ଶନ କରି ଭୁବନେଶ୍ୱର ଫେରିଆସିବେ । ଅପରାହ୍ନ ୪ ଟା ୫୫ ରେ ରାଷ୍ଟ୍ରପତି ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ରହିଛି । ରାଷ୍ଟ୍ରପତିଙ୍କ ଗସ୍ତ ପାଇଁ ଭୁବନେଶ୍ୱର , ରାଉରକେଲା, ପୁରୀ ଓ କୋଣାର୍କ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।