ରାସ୍ତା ନାହିଁ ତ ଭୋଟ ନାହିଁ
ସାଲେପୁର (ବଡ଼ ଖବର ବ୍ୟୁରୋ): ଗାଁ ମୁଣ୍ଡରେ ବ୍ୟାନର ଟାଙ୍ଗି ଅଭିନବ ପ୍ରତିବାଦ କରୁଛନ୍ତି ଗ୍ରାମବାସୀ । ରାସ୍ତା ପାଇଁ ଛୋଟ ଠାରୁ ବଡ଼ ସମସ୍ତଙ୍କ ପ୍ରତିବାଦ । ଦୀର୍ଘ ଦିନ ହେବ ଭଲ ରାସ୍ତାଟିଏ ନଥିବାରୁ ଗମନାଗମନ ପାଇଁ ନାନା ଅସୁବିଧାରେ ସମ୍ମୁଖୀନ ହେଉଛନ୍ତି ୨୦ ରୁ ଅଧିକ ପରିବାର । ଜରୁରୀକାଳୀନ ସମୟରେ ଏହି ସାହିକୁ ଆସିପାରୁନି ଆମ୍ବୁଲାନ୍ସ କି ଅଗ୍ନିଶମ ଗାଡି ।
ଏମିତି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ସାଲେପୁର ବ୍ଲକ ଭୀମଦାସପୁର ପଞ୍ଚାୟତ ବୋଧସାରା ଗ୍ରାମ ୫ ନମ୍ବର ୱାର୍ଡରେ । ବର୍ଷା ଦିନରେ ଯିବା ଆସିବା ବଡ଼ କଷ୍ଟ ହେଉଛି । ଲୋକମାନେ ବାରମ୍ବାର ସ୍ଥାନୀୟ ପ୍ରଶାସନ ଠାରୁ ଆରମ୍ଭ କରି ସ୍ଥାନୀୟ ପ୍ରତିନିଧିମାନଙ୍କୁ ନିବେଦନ କରିବା ପରେ ବି ରାସ୍ତାଟିଏ ହୋଇ ପାରିଲା ନାହିଁ । ଯେଉଁଥିପାଇଁ ଗ୍ରାମବାସୀମାନେ ସଂକଳ୍ପ ନେଇଛନ୍ତି ସାଧାରଣ ନିର୍ବାଚନ ପୂର୍ବରୁ ଯଦି ରାସ୍ତା କାର୍ଯ୍ୟ ନ ହୁଏ ତାହା ହେଲେ ଏଥର ଭୋଟ ବର୍ଜନ କରିବେ ।
ଭୋଟ ବୁଥକୁ ଯିବେ ନାହିଁ କି ଭୋଟ ଦେବେନାହିଁ । ସେପଟେ ସରପଞ୍ଚ କହିଛନ୍ତି ବ୍ୟକ୍ତିଗତ ଜମି ଥିବାରୁ ରାସ୍ତା ହୋଇପାରୁନି । ଯଦି ଗ୍ରାମବାସୀ ସରକାର ନାମରେ ଜମି କରିଦିଅନ୍ତି ତାହା ହେଲେ ରାସ୍ତା କରିଦେବୁ। ସରକାର ଗମନାଗମନର ସୁବିଧା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ଗ୍ରାମାଞ୍ଚଳରେ ତାହା କେତେ ଫଳପ୍ରଦ ହେଉଛି ବାସ୍ତବଚିତ୍ରରୁ ଅନୁମାନ ହେଉଛି । ତେବେ କେବେ ହେବ ଏହି ଗାଁ ରାସ୍ତା ଦେଖିବାକୁ ବାକି ରହିଲା ।