ମୁସଲିମ ବସ୍ତିରେ ଆରଏସଏସ ଶାଖା

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ମୁସଲିମମାନଙ୍କ ନିକଟରେ ପହଞ୍ଚିବା ଲକ୍ଷ୍ୟ ନେଇ ରାଷ୍ଟ୍ରୀୟ ସ୍ୱୟଂ ସେବକ ସଂଘ ଦେଶର ମୁସଲିମ ବହୁଳ ଇଲାକା ଗୁଡ଼ିକରେ ଅଢେଇଲକ୍ଷ ନୂଆ ଶାଖା ଖୋଲିବ । ସଂଘର ଗତକାଲି ଶେଷ ହୋଇଥିବା ୫ ଦିନିଆ ଚିତ୍ରକୂଟ ଚିନ୍ତନ ଶିବିରରେ ଏହି ନିଷ୍ପତ୍ତି ନିଆଯାଇଛି । ଶୁକ୍ରବାରଠାରୁ ମଙ୍ଗଳବାର ପର୍ଯ୍ୟନ୍ତ ଚାଲିଥିବା ଏହି ଗୁପ୍ତ ଶିବିରରେ ସଂଘ ପ୍ରମୁଖ ମୋହନ ଭାଗବତ, ସର କାର୍ଯ୍ୟବାହ ଦତ୍ତାତ୍ରେୟ ହୋସବୋଲେ ତଥା ପ୍ରାନ୍ତ ପ୍ରଚାରକ ଓ କ୍ଷେତ୍ରୀୟ ପ୍ରଚାରକଙ୍କ ସମତେ ୨୫୦ ପଦାଧିକାରୀ ଯୋଗଦେଇଥିଲେ ।

ଶିବିରର ସୁରକ୍ଷା ଓ ଗୋପନୀୟତା ଉପରେ ବିଶେଷ ଧ୍ୟାନ ଦିଆଯାଇଥିଲା । ଚିତ୍ରକୂଟର ଦୀନଦୟାଲ ଉପାଧ୍ୟାୟ ରିସର୍ଚ୍ଚ ଫାଉଣ୍ଡେସନରେ ଶିବିର ଆୟୋଜିତ ହୋଇଥିଲା । ଶିବିର ସ୍ଥଳର ପ୍ରାୟ ୩ କିଲୋମିଟର ବ୍ୟାସାର୍ଦ୍ଧ ଇଲାକାକୁ ବାରିକେଡ କରାଯାଇଥିଲା । ପାଞ୍ଚ ଜିଲ୍ଲା(ସତନା, ସୀଧୀ, ଶହଡୋଲୋ, ବାନ୍ଦା ଓ ଚିତ୍ରକୂଟ)ର ପୁଲିସ ଶିବିର ସ୍ଥଳରେ ପହରା ଦେଇଥିଲେ । ଶିବିରରେ ଭର୍ଚ୍ଚୁଆଲ ମାଧ୍ୟମରେ ଛୋଟବଡ଼ ହୋଇ ୧୫ଟି ଅଧିବେଶନ ଅନୁଷ୍ଠିତ ହୋଇଥିଲା । ସଂଘ ପକ୍ଷରୁ ଜଣାପଡିଛି ଯେ, ମୁସଲିମ ରାଷ୍ଟ୍ରୀୟ ମଞ୍ଚର ସକ୍ରିୟତା ଯୋଗୁଁ ମୁସଲିମ ସମ୍ପ୍ରଦାୟର ଲୋକମାନେ ସଂଘ ସହ ଯୋଡ଼ି ହୋଇପାରୁନାହାନ୍ତି । ସେମାନେ ବିଜେପିଠାରୁ ଦୂରତା ବଜାୟ ରଖିଆସୁଛନ୍ତି । ତେଣୁ ସଂଘ ସହ ସେମାନଙ୍କ ସମ୍ପର୍କ ସ୍ଥାପନ ଉପରେ ଚିତ୍ରକୂଟ ଶିବିରରେ ଜୋର ଦିଆଯାଇଛି ।