ରାଜ୍ୟବାସୀଙ୍କ ପାଇଁ ବଡ଼ ଆଶ୍ୱସ୍ତି, ଓଡ଼ିଶା ଛୁଇଁଲା ଦକ୍ଷିଣ-ପଶ୍ଚିମ ମୌସୁମୀ ବାୟୁ

ଭୁବନେଶ୍ୱର(ବଡ଼ ଖବର ବ୍ୟୁରୋ): ଓଡ଼ିଶା ଛୁଇଁଲା ମୌସୁମୀ! ଗ୍ରୀଷ୍ମ ପ୍ରବାହରୁ ମିଳିବ ତ୍ରାହି। ଚଳିତ ବର୍ଷ ଆଗମନରେ ବ୍ୟତିକ୍ରମ, ଦକ୍ଷିଣ ବଦଳରେ ଉତ୍ତର ଓଡ଼ିଶା ଦେଇ ପ୍ରବେଶ କଲା ମୌସୁମୀ ବାୟୁ। ରାଜ୍ୟବାସୀଙ୍କ ପାଇଁ ଆସିଛି ସବୁଠାରୁ ବଡ଼ ଆଶ୍ୱସ୍ତିକର ଖବର। ସାରା ଓଡ଼ିଶାବାସୀ ଯେଉଁ ଖବରକୁ ଚାତକ ଭଳି ଅପେକ୍ଷା କରିଥିଲେ, ତାହା ଶେଷରେ ସତ ହୋଇଛି। ଓଡ଼ିଶାରେ ଆନୁଷ୍ଠାନିକ ଭାବେ ପ୍ରବେଶ କରିଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ।

ରାଜ୍ୟର ଅନେକ ସ୍ଥାନରେ ଗତ ଦୁଇ ଦିନ ହେବ ପ୍ରାକ୍‌ ମୌସୁମୀ ବାୟୁ ସକ୍ରିୟ ଥିବାରୁ କାଳବୈଶାଖୀ ସହ ବର୍ଷା ଜାରି ରହିଛି। ପାଣିପାଗ ବିଭାଗର ଆକଳନ ଅନୁଯାୟୀ, ଚଳିତ ମାସ ଆସନ୍ତା ଜୁନ୍ ୧୯ ତାରିଖ ପର୍ଯ୍ୟନ୍ତ ଓଡ଼ିଶାର ପ୍ରାୟ ସମସ୍ତ ଜିଲ୍ଲାରେ ସାମାନ୍ୟରୁ ମଧ୍ୟମ ଧରଣର ବର୍ଷା ଲାଗିରହିବ। ମୌସୁମୀ ବାୟୁ ସାରା ଓଡ଼ିଶାକୁ ଆଗ୍ରସର ହେବା ପାଇଁ ପାଗ ସମ୍ପୂର୍ଣ୍ଣ ଅନୁକୂଳ ଥିବା ବେଳେ, ଏହା ଚାଷୀକୂଳ ପାଇଁ ବେଶ୍ ଆଶ୍ୱସ୍ତି ଆଣିଦେଇଛି। ଏହି ବର୍ଷା ଦ୍ୱାରା ତାପମାତ୍ରାରେ ଉଲ୍ଲେଖନୀୟ ହ୍ରାସ ଘଟିବା ସହ ଉମେଇ ସ୍ଥିତିରୁ ସାଧାରଣ ଜନତାଙ୍କୁ ବଡ଼ ତ୍ରାହି ମିଳିବ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।