ଗୋଡ଼ାଇ ଖାଉଛି ଭୟ

ସୁବର୍ଣ୍ଣପୁର (ବଡ଼ ଖବର ବ୍ୟୁରୋ): ଗରିବ ଓ ଅସହାୟ ଲୋକଙ୍କ ଲାଗି ସରକାର ପ୍ରଣୟନ କରିଛନ୍ତି ଆବାସ ଯୋଜନା । ମାତ୍ର ପ୍ରକୃତ ହିତାଧିକାରୀ ଏହାର ଫାଇଦା ଉଠାଇପାରୁ ନାହାନ୍ତି । ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ବଘିଆ ପଞ୍ଚାୟତ ଖୁଣ୍ଟବନ୍ଧ ଗାଁରେ ଦେଖିବାକୁ ମିଳିଛି ଏହାର ଜ୍ୱଳନ୍ତ ଉଦାହରଣ । ଦିବ୍ୟାଙ୍ଗ ପରିବାରକୁ ମିଳୁନି ଆବାସ ଯୋଜନା । ଖୁଣ୍ଟବନ୍ଧ ଗାଁର ୫୦ ବର୍ଷୀୟା ପଙ୍କଜିନୀ ହରିପାଳ । ହାତଗୋଡ଼ ପ୍ରାୟ ନାହିଁ କହିଲେ ଚଳେ । ତାଙ୍କର ୪୬ ବର୍ଷୀୟା ସାନଭଉଣୀ ଶକୁନ୍ତଳାଙ୍କ ଆଖିକୁ ଦିଶୁନାହିଁ । ତାଙ୍କ କାନକୁ ମଧ୍ୟ ଶୁଭୁନାହିଁ । ସାନଭଉଣୀ ଓ ୮୦ ବର୍ଷୀୟା ରୋଗୀଣା ବୁଢ଼ୀ ମା’ଙ୍କୁ ନେଇ ପଙ୍କଜିନୀଙ୍କ ପରିବାର । ପରିବାରରେ କେହି ଜଣେ ହେଲେ ବି ପୁରୁଷ ନାହାନ୍ତି । ପଙ୍କଜିନୀଙ୍କ ଉପରେ ରହିଛି ପରିବାରର ବୋଝ । ପଙ୍କଜିନୀ ଗୁରୁଣ୍ଡି ଗୁରୁଣ୍ଡି ମା’ ଭଉଣୀଙ୍କ ସେବା କରିବା ସହ ରୋଷେଇବାସ କରୁଛନ୍ତି ।

ଭଙ୍ଗା ଦରରା କୁଡ଼ିଆରେ ଏମାନଙ୍କ ଜୀବନ ବିତୁଛି । ଭତ୍ତା ଟଙ୍କାରେ ଭାଗ୍ୟକୁ ଆଦରି ଭଙ୍ଗା ଦରରା କୁଡ଼ିଆରେ ପଡ଼ିରହିଛଛନ୍ତି ଏମାନେ । ଚାଳ ଛପରଘରେ ସବୁବେଳେ ରହୁଛି ନିଅାଁର ଭୟ । ପରିବାର ସମସ୍ତେ ଭିନ୍ନକ୍ଷମ ହୋଇଥିବାରୁ ଏହି ଭୟ ସବୁବେଳେ ସେମାନଙ୍କୁୂ ଗୋଡ଼ାଇ ଖାଉଛି । ଆବାସ ଯୋଜନାରେ ପକ୍କାଘର ଖଣ୍ଡେ ଲାଗି ସରପଞ୍ଚଙ୍କଠାରୁ ଆରମ୍ଭ କରି ଜିଲ୍ଲାପାଳଙ୍କୁ ଜଣାଇଥିଲେ ସୁଦ୍ଧା ଫଳାଫଳ ଶୂନ । ଆବାସ ଯୋଜନାରେ ପକ୍କାଘର ଖଣ୍ଡେ ମିଳିଲେ ବାକି ଜୀବନ ଖୁସିରେ କାଟି ଦିଅନ୍ତେ ବୋଲି କହିଛନ୍ତି ପଙ୍କଜିନୀ ।