କେନ୍ଦ୍ରର ପିଏମ ପୋଷଣ ଯୋଜନା

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ସ୍କୁଲରେ ଛାତ୍ରଛାତ୍ରୀମାନଙ୍କୁ ମଧ୍ୟାନ୍ନ ଭୋଜନ ଦେବା ପାଇଁ କେନ୍ଦ୍ର ସରକାରଙ୍କ ନୂଆ ଯୋଜନା । ଯାହାର ନାମ ରହିଛି ପିଏମ ପୋଷଣ ସ୍କିମ । ଯାହା ଦ୍ୱାରା ଦେଶରେ ୧୧.୨ ଲକ୍ଷ ସ୍କୁଲରେ ପାଠପଢୁଥିବା ପିଲାମାନେ ଉପକୃତ ହେବେ । ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟରେ ଏକ ବୈଠକରେ ଏହି ନିଷ୍ପତି ନିଆଯାଇଛି । କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଥିଲେ ଏହି ଯୋଜନା ୫ ବର୍ଷ ପର୍ଯ୍ୟନ୍ତ କାର୍ଯ୍ୟକାରୀ ହେବ ।

ଏ ବାବଦରେ ୧.୩୧ ଲକ୍ଷ କୋଟି ଟଙ୍କା ଖର୍ଚ୍ଚ ହେବ । ବର୍ତ୍ତମାନ ଚାଲୁଥିବା ମଧ୍ୟାନ୍ନ ଭୋଜନ କାର୍ଯ୍ୟକ୍ରମ ସ୍ଥାନରେ ପିଏମ ପୋଷଣ ସ୍କିମ କାର୍ଯ୍ୟକାରୀ ହେବ । ଏଥିରେ କେନ୍ଦ୍ର ସରକାରଙ୍କ ଅନୁଦାନ ଅଧିକ ରହିବ । କେନ୍ଦ୍ର ସରକାର ଦେଶରୁ ଅପପୁଷ୍ଟି ଜନିତ ସମସ୍ୟା ସମ୍ପୁର୍ଣ୍ଣ ଦୂର କରିବାକୁ ଲକ୍ଷ ରଖିଛନ୍ତି ।