କ୍ଷମତାକୁ ଆସୁ ଆସୁ ଦେଶର ନାମ ବଦଳାଇଲା ତାଲିବାନ

(ବଡ଼ ଖବର ବ୍ୟୁରୋ): ତାଲିବାନୀ ଯୋଦ୍ଧାମାନେ ରବିବାର କାବୁଲ ଦଖଲ କରିବା ସହ ରାଷ୍ଟ୍ରପତି ଭବନକୁ ନିଜ କବଜାକୁ ନେଇ ସେଠାରେ ରାଷ୍ଟ୍ରୀୟ ଧ୍ୱଜା ସହ ତାଲିବାନୀ ଝଣ୍ଡା ଉଡାଇବା ଫଳରେ ସମଗ୍ର ଆଫଗାନିସ୍ତାନରେ ଆରମ୍ଭ ହୋଇଛି ତାଲିବନୀ ରାଜ୍ । ତାଲିବାନୀର ସହ ପ୍ରତିଷ୍ଠାତା ମୁଲ୍ଲା ଅବଦୁଲ ଗନୀ ବରାଦରଙ୍କୁ ନୂତନ ରାଷ୍ଟ୍ରପତି ଭାବେ ନିଯୁକ୍ତି କରାଯାଇଛି । ୨୦ ବର୍ଷ ପରେ କ୍ଷମତା ପୁନର୍ଦଖଲ କରିବା ମାତ୍ରେ ତାଲିବାନୀମାନେ ଦେଶର ନୂଆ ନାମ ଦେଇଛନ୍ତି ‘ଇସଲାମିକ ଏମିରେଟ ଅଫ୍ ଆଫଗାନିସ୍ତାନ’ ।

୨୦ ବର୍ଷ ପୂର୍ବେ ତାଲିବାନୀମାନେ ଧାର୍ମିକ ଶୁଦ୍ଧୀକରଣ ଓ ଏମିରେଟ ଗଠନ ଉଦ୍ଦେଶ୍ୟରେ ଦେଶର ଠିକ୍ ଏହି ନାମକରଣ କରିଥିଲେ। ନୂଆ ନାମ ଘୋଷଣା ହେବା ମାତ୍ରେ ସାରା ଦୁନିଆ ଡରିଯାଇଛି । ବ୍ରିଟେନ୍, ଆମେରିକା ସମେତ ପାଶ୍ଚାତ୍ୟ ଦେଶମାନେ ଆପତ୍ତି ଉଠାଇଛନ୍ତି । ପୂର୍ବରୁ ବ୍ରିଟେନ କହିଥିଲା, କୌଣସି ପରିସ୍ଥିତିରେ ପୃଥିବୀରେ ଆଉ ଏକ ଇସଲାମିକ ଏମିରେଟର ଅଭ୍ୟୁଦୟକୁ ପ୍ରଶୟ ଦିଆଯିବ ନାହିଁ । ବ୍ରିଟେନ ଓ ଆମେରିକାର ଚେତାବନୀ ପ୍ରତି ଭୂକ୍ଷେପ ନକରି ତାଲିବାନୀମାନେ ଦେଶର ନୂଆ ନାମ ଘୋଷଣା କରିଛନ୍ତି ।