ୟୁନିଭର୍ସିଟିରେ ପଢୁଥିବା ଛାତ୍ରଛାତ୍ରୀଙ୍କ ପାଇଁ ନୂଆ ନିୟମ ଜାରି କଲା ତାଲିବାନ
ଭୁବନେଶ୍ୱର(ବଡ଼ ଖବର ବ୍ୟୁରୋ): ତାଲିବାନର ଅସଲ ଚେହେରା ସାରା ବିଶ୍ୱ ଦେଖିଆସୁଛି । ଏହାରି ମଧ୍ୟରେ ୟୁନିଭର୍ସିଟିରେ ପଢୁଥିବା ଛାତ୍ରୀଙ୍କ ପାଇଁ ନୂଆ ନିୟମ ଜାରି କରିଛି ତାଲିବାନ । ତେବେ ୟୁନିଭର୍ସିଟିରେ ପଢୁଥିବା ଛାତ୍ରୀଙ୍କୁ ଅବାୟା ରୋବ ଓ ନିକାବ ପିନ୍ଧି ଆସିବାକୁ ପଡିବ ଯେପରି ସେମାନଙ୍କ ମୁହଁ ସମ୍ପୂର୍ଣ୍ଣ ଢାଙ୍କି ରହିବ ବୋଲି ତାଲିବାନ ସରକାର କହିଛନ୍ତି । ଏହା ସହ ଛାତ୍ର ଏବଂ ଛାତ୍ରୀଙ୍କ ପାଇଁ ଭିନ୍ନ ଭିନ୍ନ କଲେଜ କରିବାକୁ ନିର୍ଦ୍ଦେଶ ଦିଆଯାଇଛି ।
ଯଦି ଅଲଗା କଲେଜ ନହୁଏ ତାହାଲେ ପୁଅ ଓ ଝିଅମାନଙ୍କୁ ଅଲଗା ଅଲଗା ଧାଡିରେ ବସାଇ ମଝିରେ ପରଦା ପକାଇବାକୁ କୁହାଯାଇଛି । ତାଲିବାନର ଆଦେଶ ଅନୁଯାୟୀ ଛାତ୍ରୀମାନଙ୍କୁ ପଢିବାକୁ ମହିଳା ଶିକ୍ଷକ ରଖିବାକୁ ଆଦେଶ ଦିଆଯାଇଛି । ଆଦେଶ ଅନୁଯାୟୀ ଯଦି ଏପରି ନହୁଏ ତାହାଲେ ଛାତ୍ରୀମାନଙ୍କୁ ପଢିବାକୁ ବୃଦ୍ଧ ପୁରୁଷ ଅଧ୍ୟାପକ ରଖାଯିବ ବୋଲି କୁହାଯାଇଛି । ଅପରପକ୍ଷରେ ତାଲିବାନ ସ୍କୁଲ ଓ କଲେଜ ଖୋଲିବାକୁ ଅନୁମତି ଦେଇଛି ସତ ହେଲେ ସ୍କୁଲ, କଲେଜ ଯାଉଥିବା ଛାତ୍ରଛାତ୍ରୀଙ୍କ ପାଇଁ ଲମ୍ବା ଚଉଡା ଆଦେଶ ଜାରି କରିଛି ତାଲିବାନ ।