ଆଜି ଅନୁଷ୍ଠିତ ହୋଇପାରେ ଶ୍ରୀଜିଉଙ୍କ ବନକଲାଗି ନୀତି
ପୁରୀ (ବଡ଼ ଖବର ବ୍ୟୁରୋ): ଶ୍ରୀଜିଉଙ୍କ ବନକଲାଗି ନୀତିକୁ ନେଇ ଦିନକୁ ଦିନ ବଢିବାରେ ଲାଗିଛି ବିବାଦ । ଆଜି ବନକଲାଗି ନୀତି ସମ୍ପାଦନ କରିବାକୁ ଶ୍ରୀମନ୍ଦିର ଦତ୍ତମହାପାତ୍ର ନିଯୋଗକୁ କଡା ନିର୍ଦ୍ଦେଶ ଦେଇଛନ୍ତି ଶ୍ରୀମନ୍ଦିର ପ୍ରଶାସନ ।
ଏନେଇ ଦତ୍ତ ମହାପାତ୍ର ନିଯୋଗ ସହ ଆଲୋଚନା କରିଛନ୍ତି ଜିଳ୍ଲାପାଳ । ନୀତିରେ ବ୍ୟତିକ୍ରମ ହେଲେ କଠୋର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ୨୦୧୮ ରୁ ପ୍ରତି ବୁଧବାର ବନକଲାଗି କରାଯିବାପାଇଁ ପରିଚାଳନା କମିଟି ନିଷ୍ପତ୍ତି ନେଇଥିଲା ।
କିନ୍ତୁ ନୀଳାଦ୍ରୀ ବିଜେର ୨୫ ଦିନ ପରେ ବି ବନକଲାଗି ନୀତି ହୋଇପାରି ନାହିଁ । ଗତ ବୁଧବାର ନୀତି ସଂପାଦନ ନ କରିଥିବାରୁ ଦତ୍ତମହାପାତ୍ର ନିଯୋଗକୁୁ ନୋଟିସ ଜାରି ହୋଇଥିଲା । କିନ୍ତୁ ଜବାବରେ ଉତ୍ତର ସନ୍ତୋଷ ଜନକ ନଥିଲା ।
ଏଥି ନିମନ୍ତେ ପୁଣି ଥରେ ଆଜି ବନକଲାଗି ନୀତି କରିବାକୁ ଶ୍ରୀମନ୍ଦିର ପ୍ରଶାସନ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ରେକର୍ଡ ଅଫ ରାଇଟସ୍ ଆଧାରରେ ଗୁରୁବାର ବନକଲାଗି ନୀତି କରିବାକୁ ଜିଦରେ ଅଡି ବସିଛନ୍ତି ଦତ୍ତମହାପାତ୍ର ସେବାୟତ ।