କର୍ତ୍ତବ୍ୟନିଷ୍ଠଙ୍କୁ ମାନପତ୍ର

ଭୁବନେଶ୍ୱର (ବଡ଼ ଖବର ବ୍ୟୁରୋ): କଟକ ଶିଖରପୁର ଛକରେ ଟ୍ରାଫିକ୍ ଡ୍ୟୁଟି କରୁଥିବା ହାବିଲଦାର ଲଳିତ ମୋହନ ରାଉତଙ୍କ କର୍ତ୍ତବ୍ୟ ପରାୟଣତା ପଥଚାରୀଙ୍କୁ ମୁଗ୍ଧ କରୁଛି । ତାଙ୍କର ଟ୍ରଫିକ୍ ପରିଚାଳନାର କାଇଦା ସମ୍ପୂର୍ଣ୍ଣ ନିଆରା । ସୋସିଆଲ ମିଡିଆରେ ତାଙ୍କର ଚର୍ଚ୍ଚା ଛାଇ ହୋଇଯାଉଛି । ଦୁର୍ଘଟଣା ଆଶଙ୍କା ଦୂର କରିବା ପାଇଁ ରାସ୍ତାରେ ପଡ଼ିଥିବା ବଜୁରି, ଚିପ୍ସକୁ ଝାଡୁ ମାରି ସଫା କରିଥିଲେ ଲଳିତମୋହନ । ଲୋକଙ୍କ ନିରାପଦ ଯାତ୍ରା ପାଇଁ ରାସ୍ତାରେ ଲଳିତମୋହନ ଝାଡ଼ୁ ମାରୁଥିବା ଭିଡିଓ ସୋସିଆଲ ମିଡିଆରେ ଗତ ୧୭ରେ ଢେର ଭାଇରାଲ ହୋଇଥିଲା । ତାଙ୍କ ନିକଟକୁ ଛୁଟିଥିଲା ପ୍ରଶଂସାର ସୁଅ ।

ଲଳିତମୋହନଙ୍କ କର୍ତ୍ତବ୍ୟ ପରାୟଣତା, ଟ୍ରାଫିକ୍ ପରିଚାଳନାରେ ଦକ୍ଷତାକୁ ଚିହ୍ନିପାରିଛି କମିଶନରେଟ୍ ପୋଲିସ । ଆଜି ସିପି ସୁଧାଂଶୁ ଷଢ଼ଙ୍ଗୀ ଲଳିତମୋହନ ରାଉତଙ୍କୁ ଦେଇଛନ୍ତି ମାନପତ୍ର । ପୋଲିସସେବା ଭବନର ସମ୍ମିଳନୀ କକ୍ଷରେ ଆୟୋଜିତ ଉତ୍ସବରେ ମାନପତ୍ର ଗ୍ରହଣ କରି ଭାବବିହ୍ୱଳ ହୋଇପଡିଥିଲେ ଲଳିତମୋହନ । ମାନପତ୍ର ସହ ତାଙ୍କୁ ମଧ୍ୟ ପ୍ରୋତ୍ସାହନ ବାବଦରେ ଦିଆଯାଇଛି ୧ହଜାର ଟଙ୍କା । ଏହି ଉତ୍ସବରେ ବହୁ ବରିଷ୍ଠ ପୋଲିସ କର୍ମଚାରୀମାନେ ଯୋଗଦେଇଥିଲେ । ଭବିଷ୍ୟତରେ ଲଳିତମୋହନ ଏଭଳି ସେବା ଜାରି ରଖିବା ପାଇଁ ବରିଷ୍ଠ ଅଧିକାରୀମାନେ ପରାମର୍ଶ ଦେଇଛନ୍ତି ।